حبيتها من طرف واحد

شوفتك النهاردة في جامعة خارجة من الامتحان كنت واقفه لوحدهك كنت عاوز اروح اسلم عليكي وعرف اخبارك وسألك عملتي ايه؟ زي ما كنت بسألك دايما بس لقيت صاحبك الجديد راح كلمك وكنتوا بتضحكوا مع بعض وقتها كنت مبسوط انك فرحانة بس مضايق في نفس الوقت وفتكرت وقتها انا ليه بعدت عنك؟

لأني اعترفت بمشاعري ليكي قبل اي حد تاني كنت اول حد يعرفك في جامعة كنت دايما معاكي رغم كثر الناس حوليا يمكن معرفتش اقولك كلام حلو او ابين الي جوايا بس أعتقد انه أفعالي ومحاولاتي قالتلك كل حاجة ومع ذلك انت رفضتيني وشايفه اننا مجرد صحاب وقتها ادركت انه عملت الي أقدر عليه ومفيش حاجة تاني ممكن تتعمل وفضلنا صحاب رغم عدم أقتناعي بصداقة الولد والبنت لكن مكنتش عاوز اخسرك بأي شكل كان

كنت حابب افضل جنبك دايما لكن مع الوقت بدأت اشوف منك انه انا مبقتش فارق معاكي زي الأول بدأت احس ان العلاقة بقي فيها نوع من التجاهل والبرود و اني مجرد ضيف في المكان أو المكان مبقاش مكاني بالذات لما صاحبك الجديد ظهر وكان لازم اتعامل عادي وقتها وحاولت.... حاولت كثير اوي بس معرفتش يمكن لأني بحاول اعمل نفسي مش بحبك؟

فضلت جنبك رغم الأذي الي كنت باخده كل يوم بسببك وانت مش حاسه بده بالذات لما شوفتك بتعملي حاجات لناس مكنتيش بتعمليها معايا وبدأت احس انه انا بقيت تقيل عليكي او مجبرة تتعاملي معايا و في النهاية جه اليوم الي حسيت فيه انه انا تعبت كفاية و انطفيت وقررت أبعد وكأني نسيتك و نسيت الي كان بينا رغم ان اخر كلام بينا كان عادي ولكن الموضوع فعلا جه فجأة بدون اي تخطيط

وأنت لاحظتي ده ويمكن أستغربتي ولكن في النهاية قررتي تتجاهلي انت كمان وفضلت العلاقة كده بدون كلام مع نظرات خفية بينا احنا الاتنين من بعيد وتقريبا العلاقة شبه أنتهت

أحيانا بلوم نفسي أنه بعدت لما بشوف حد تاني خد مكاني ومبقتش أعرف عنك حاجة او اشوفك عايشه حياتك عادي بس مكنش في حاجة في ايدي اقدر اعملها انا اختارتك وأنت مخترتنيش كنت مجرد صفحة في كتابك وأنت كنت الكتاب كله بالنسبالي

تعبت وانا بحاول اعمل الصح وأنا عامل نفسي مش فارق معايا وهي فارقة جدا معايا كنت فاكر انه لما هبعد عنك هرتاح لكن الحقيقة انه لا البعد ريحني ولا القرب ريحني بقيت واقف في المنتصف مش عارف بعمل ايه

أنت وحشتيني اوي يا ندى بس مينفعش