كلام يدل على الكراهية بسبب اختلاف الشهادات

استوقفني موقف صار كدامي، صراحة كنت مستغربة من الي سمعته، والي هو كان اكو شلة شباب من كليات مختلفة من الهندسة وعلوم الحاسبات وغيرها من الاختصاصات خارج المجموعة الطبية. كنا مجموعين في مكان عن طريق اصدقاء مشتركين وصار نقاش عن ازمة السادس بالعراق والتعليم وهوس المجموعة الطبية، الي صدمني انه احد الاشخاص وصف الناس الي معدله عالي و يختار الطب فهذا عديم شخصية وماشي بقناعة المجتمع او قناعة اهله و ما عنده اي رأي او اهتمام بمجال اخر.

انا شخصيًا ادرس بكلية الطب و عالرغم هي مو تخصصي المفضل لكن هو اكثر شي كدرت انجز بيه وما اتخيل نفسي بغير مكان صراحة. بالاضافة للجهد المبذول والسهر والتعب، واكيد زملائي يفهمون مقصدي.

برأيكم شنو سبب هذا الكلام؟ وليش بالوقت الحالي صارت اكو نظرة سلبية بهالشكل تجاه المجموعة الطبية؟

مع العلم انا لا انكر كون معظم الطلبة العراقيين يختاروها علمود التعيين وممكن المكانة الاجتماعية وغيره من الاسباب، لكن اكيد هالشي ميعم الكل. واكو مشكلة اخرى ما تتعلق بكلامي الفوك بس هم احب اسمع رأيكم ، وهو انه اكو كره مبطن في المجتمع تجاه شريحة الاطباء، كوصفهم بالجشعين وعديمي الانسانية وغيرها من الصفات السلبية، لكن بنفس الوقت الشخص الي يكول هالكلام من يشوف ابنه كدامه يكله "ان شاء الله تصير دكتور".. احس اكو تناقض قوي.