اول شيء شرح خفيف، المؤسَّسة الأم هي (ويكيميديا) وهي غير ربحية موجودة عشان تفيد الناس، وتعيش على التبرعات، وترى كل مشاريعها مرتبطة ببعض.

يمكن تلخبط بينها (ويكيميديا) وبين (ويكيبيديا)، الفرق حرف الميم، والفرق الثاني ان (ويكيبيديا) مجرد مشروع من مشاريع (ويكيميديا) الكثيرة، وويكيبيديا عبارة عن موسوعة كلها مقالات. 

وتوجد كذلك موسوعة الصور (كومنز)، هو واحد من مشاريعها المهمة نفس ويكيبيديا وكلهم تحت مظلة الأم (ويكيميديا)، وتراه مرتبط في ويكيبيديا، وما تقدر تحط اي صورة داخل ويكيبيديا، إلا الصور الموجودات داخل كومنز فقط! اي صورة خارجها ما تقدر.

وكذلك عندك (ويكي بيانات) اللي هي عبارة عن المعلومات الأساسية لأي شيء تسجله، كأنها بطاقة الأحوال بس لكل شيء، وكل شيء تسجله تراه يظهر في (صناديق المعلومات) اللي في ويكيبيديا، كل شيء مرتبط ببعضه.

وبالنسبة للذكاء الاصطناعي، تخيل احد يسأله "أين تقع الرياض"، أحد اشهر المصادر اللي بيجيبها له بتكون ويكيبيديا، تخيل ما فيه مقالة عن الرياض؟ بيروح يكيّس عليه ويقوله الرياض حي من احياء لندن (خبصات الذكاء الاصطناعي)، يعني أنت بتطوعك لكتابة المقالة ساعدت الناس تعرف المعلومة باختلاف لغاتهم! لا ومو اي معلومة، عن وطنك!

وحتى بدون الذكاء الاصطناعي، اذا بحثت عن اي شيء، اول موقع يطلعه لك المتصفح ومحرك البحث دائما هو ويكيبيديا! تخيل الاعداد المليونية اللي بتقرأ مقالاتك المتواضعة اللي ما تكلّفت وانت تكتبها! عدم وجود مقالة عن موضوع مهم بيعاني منه شعبك اكثر شيء بسبب شح المعلومة.  

تخيل ياباني وهولندي وسعودي وروسي كلهم يسألون الذكاء الاصطناعي، والذكاء يعطيهم الاجابة اللي كتبتها أنت