السلمون

قاعد بقالي كام يوم بتفرج على هيل'ز كيتشين ولقيت نفسي بطلع القصة القصيرة دي، اتمنى تقرؤوها

احنا في سيناريو افتراضي محدش من شخصياتنا جرب سلمون في حياته قبل كدا

عندنا قطعة سلمون، قطعة السلمون دي بيدّعي أحد الشيفات المسمى بـأنديشه برغاني وهو واحد من أشهر الشيفات الايرانيين انها هي قطعة السلمون الأعظم في التاريخ وان كل ما سواها هي قطع رديئة ومينفعش خالص على أي حد مش شيف إنه يعايرها بقطعة تانية

بعد كدا طلب مننا الشيف أنديشه إننا نخش نقول قدام لجنة حكّام مؤلفة من نفر واحد نقول قدامه ان قطعة السلمون دي هي أمثل وأعظم وأجمل قطعة سلمون جربناها في حياتنا وان قطعة السلمون قطعا هي احسن من اي قطعة سلمون تانية وان كل ما سواها في قمة الرداءة وانها قادرة تعجب أي حد ملهوش او غير مهتم بالاسماك وقادرة تقنعه اقناع تام بمدى حلاوتها والدليل على كدا ان بعض الشيفات من اصدقاء واعداء انديشه جربوها وعجبتهم لابعد حد - احنا ممنوعين من تجربة قطعة الآخر بالمناسبة -

دخلنا ما يشبه تجارب الاداء والتكييف كان فاصل والمراوح عطلانة وفي صهد مش طبيعي طالع من منور المطبخ

دخلنا اتفاجئنا ان في ٤٢ قطعة سلمون مرصوصين كل قطعة قاعد قدامها مجموعة من الانفار متغايرين جدا في الاعداد، في قطع قدامها نفر وفي اللي قدامها ما يربو على ال ٢٠٠ وكل واحد قدامه سلمون مختلف تماما عن اللي في ايدينا، سألت اللي جنبي وكانوا نفرين واحد ايده مقطوعة والتاني رجله مقطوعة وكان واقف عليهم شيف اسمه ميمون، سالتهم عن احوالهم وسالتهم عن ايه نوع السلمون بتاعهم، قالولي انها امثل قطعة سلمون عرفتها الكرة الارضية وانها مش بس هي الاحسن ولكنها قادرة تغير ذوق اي حد ملهوش في السمك، سالتهم وهل عايرتوها بأي شيء تاني؟ قالولي لا عندنا مينفعش احنا كفاقدين للذوق ان احنا نعاير، بس شيفنا ميمون هو واصحابه اجمعوا انها امثل قطعة سلمون عرفتها جمعاء واحنا بنثق فيهم تمام الثقة

جربنا ندوق قطعة ميمون وهما طلبوا يدوقوا قطعة انديشه واتفاجئنا ان كل واحد فينا قال ان قطعة الاخر رديئة

كان قاعد جنبنا ٢٥٠ نفر بيقولوا ان قطعتهم برضو هي الامثل، وشيفهم ابن خالته يبقى له اسهم في بسكوت المعمدان، بدون استطراد حصل برضو نفس القصة

دخلنا جوا واحد ورا التاني للجنة الكام المكونة من نفر وكل مرة نسمع صويت ونحيب كل ما حد يدخل لحد ما دخلنا، واكتشفنا بعدها ان الشيف انديشه شكله اتغير تجاهنا وبقى شمتان فينا

اتفاجئنا ان الموزع المعتمد لقطع السلمون كانت هي لجنة الحكام، ولجنة الحكام كانت قايلة لكذا شيف منهم ان فعلا القطعة دي هي أحسن قطعة موجودة والشيفات قالولنا كدا، بعد كدا اكتشفنا ان لجنة الحكام كانت بتغير رأيها كل شوية

سألنا لجنة الحكام، ليه مخليتناش نقدر نعاير قطع السلمون من الاساس مع التانيين عشان نقدر نحدد، وليه مكانش في حاجة تقدر تقنعنا كلنا بان في قطعة معينة هي الامثل دونا عن الباقيين بخلاف ان احنا قعدنا نردد اللي قالوهلنا شيفاتنا ؟ وليه اصلا يبقى محور تجربة الاداء على قطعة السلمون، مش احنا جوانا ذائقة مخلوقين بيها، مش دي حاجة منقدرش نغيرها؟ مش الوسط المحيط برضو مؤثر؟ يعني لو مكنتش قابلت الشيف انديشه كنت ممكن يبقى تقييمي صح؟ ليه حطيتلي الشيف انديشه؟ ليه مكانش في دلائل قاطعة ان قطعة السلمون دي كانت دايما هي الاحسن في ذاتها دونا عن الباقي، ليه عاوز تخسرنا تجارب الاداء؟ لو انت ناوي تخسرنا؛ حطيتنا ليه؟ حتى السلمون اللي انت كسّبته بعد ما دوقناه لقيناه مايع زيه زي الباقي؟ ليه القطعة دي بالذات كسبت؟ لو المشكلة في ذائقتنا ليه عندنا الذائقة دي؟

بعد خطابنا لجنة التحكيم رفضت تكلمنا او حتى تبصلنا وبدأنا نعرف بعدين ايه سر النحيب والصريخ