محاولة إنقاذ أخويا

مش عارف الصب هيكون طويل ولا لا، لكن محتاج نصيحة في موقف مع أخويا الصغير.

دلوقتي أخويا من ساعة ما دخل ثانوي ابتدى يظهر عليه بوادر السرسجة من طريقة كلام ومظهره الخارجي، كان الموضوع طفيف يعني وأنا كنت بقعد أتعامل معاه ب لين وبفهمه إن كدة غلط وإن أبوك وأمك ناس محترمين ومش وش الكلام ده، وهو كان بيقولي متقلقش ده هزار معاكم وإنه يعني بينكشنا مش أكتر، وفعلا كان يعني بيتعامل عادي وأنا كنت دايما أنصحك ف موضوع الشكل سواء لبس أو حلاقة وبرضك كان يعني بيطلع سلمة ويقع تاني بس كنت بقول على الأقل بيحاول ومستجيب، وكان دايما يقولي إنه عايز يدخل صيدلة وإنه هيركز ويحاول يحقق ده.

جت فترة تانية ثانوي وكان في ضغوطات على العائلة بسبب الماديات، وأنا كنت بحاول أدور على شغل جمب الجامعة فصراحة كنت مشغول عنه ومكنتش متابعه أول بأول وده غلط من عندي. الحمدلله ربنا كرمنا ووالدتي سافرت برة وأنا كنت لقيت شغل والأوضاع ابتدت تستقر لكن هو اللي كان فيه حاجة غلط، كان يعتبر ف دخل في الطريق ده بشكل أكبر شوية، ولما كنت بكلمه كان بيتجنب الكلام معايا ونظرا لأني كنت بتشغل وقتها فكان بيقعد مع خالتي - والداي كانوا منفصلين، ووالدي الله يعينه ويشفيه كان عانى من جلطات كتير ف مفيهوش حيل للمناهدة بس كان بينصحه وبيقعد معاه يفهمه برضك - وخالتي كانت مظبطاه لكنه كان شايف ده تضييق على حريته وابتدى يتمرد وده خلاني أتخانق معاه، بس قعدنا اتكلمنا وقتها وفهمته أني متفهم إن غياب والدتي مأثر عليه وإنها سافرت عشان تشتغل وتعرف تصرف عليك، وإن باباك رغم مرضه لسة مكمل وبيحاول يساعدك ويديمك ربنا يعينهم هما الاتنين، وإني أنا برضك شغال عشان أشيل جزء من المصاريف على الأقل عنهم ويخفف حمل عليهم، وهنا هو بكى وقالي أنت صح وإنه هيتغير وكان فعلا بيتعامل كويس.

دلوقتي هو ف تالتة وبقا في تحول غريب من قبلها بشوية، حلاقات سرسجية بحت، طريقة اللبس بتاعتهم والكيا سبورتاج اللي بيلبسوها في رجلهم دي، ده غير طريقة الكلام اللي مع البيت، واللي حصل بيني بينه مشادة بسببها أكتر من مرة، بالإضافة إن صحابه نفس الخصال برضك وأنا نصحته يبعد عنهم وإنه مش شبهنا ولا شبهك وبرضك كان متجاوب معايا وده اللي كان مخليني مفقدش الأمل فيه، والدتي عملت له لم شمل وسافر وكان ابتدى يتغير شوية، ولكن عدا شهر و١٠ أيام على سفره، ف بكلمه لقيته بيقولي أنا مش عايز دروس ف ثانوي ووفروها، وإنه هيدخل أي كلية وخلاص عشان يبقى اسمي معايا شهادة، ف بقوله طب وصيدلية وليه التحول المفاجئ ده؟ يقولي هو كدة وأنا شايف إني مش حابب الوضع ومش هذاكر وبتاع، فقولتله إن كدة غلط وإنه لازم يجتهد ويحاول حتى لو مدخلش في الآخر بس يبقى اسمه حاول، وكمان عشان يجيب نتيجة كويسة على الأقل تساعده لو عايز يعمل تدريب مهني برة لأن بيبقى ليها متطلبات ومجموع معين لو أنت مش من أهل البلد، قام عاوجلي في بقه وإن هو شايف إنها أي قرار هو براحته فيه وأي حاجة هتأثر عليه ولوحده وعايش فالدور ده. صراحة شديت معاه وفتحت فيه إنه عايز يصيع ويبقى زي صحابه وعايشلي ف دور البطل اللي الدنيا كلها واقفة ضده وإنه موهوم، وهو مصمم إنه لو سبناه من غير حاجة هيعرف يبدأ من الصفر وهيبني نفسه والشغل ده، فقولتله إنك عشان طلعت وضمنت إنك برة ومحدش معاك ولا شديد عليك هتعمل اللي أنت عايزه ولا حد من صحابك لعبلك ف دماغك وشدينا مع بعض، خصوصا لما كلم والدتي بأسلوب مش حلو وأنا توعدتله إنه لما ينزل مصر إني هفوقه كويس، رغم إني مش بحب العنف في التعامل ولكن هو تخطى حدوده.

النصيحة اللي طالبها هي أعمل إيه ف الوضع ده عشان أنقذ أخويا من القرف اللي هو فيه قبل ما يضيع أكتر، ممكن ناس تقولي العنف والضرب هيجيب نتيجة عطسية وهيخليه يتمرد أكتر بس حرفيا هو تعدى حدوده جامد + معرفش ده صح ولا لا بس كنت عايز أكلم حد من صحابه - غالبا الواد اللي لاعب ف دماغه، والواد اتسجن قبل كدة برضك - وأقوله إنه يبعد عنه وميكلموش تاني، مع إن حاسس الموضوع ممكن يطلب بتناقش بس صدقا أنا مش عارف أعمل إيه أنا أكبر من أخويا ب ٥ سنين وعلاقتنا عادية يعني، بس مقدرش أقول إننا قريبين أعمل إيه