مشكلة لو تقدر تحلها حلها

بصراحة أنا عندي مشكلة… أي بنت في سني شكلها جميل ممكن أعجب بيها، وأقعد أتخيل إنها هتقع في حبي وتيجي تقولي "أنا بحبك". ساعات بشغل أغاني وائل جسار وأعيش الجو ده في دماغي، مع إني عارف إن ده مش هيحصل، لأني مش شخص ملفت، معنديش عضلات، تخين، ومش بهتم بنفسي.

خايف أوصل يوم وما لاقيش البنت اللي أحبها، أو أموت من غير ما حد يحبني غير أهلي وصحابي. كمان أنا مش بعرف أتكلم كويس، وسلبي جدًا. في الثانوية العامة سقطت مادة، ومش هقدر أدخل الكلية اللي كنت عايزها، ولا حتى مكان محترم آخد فيه تعليم كويس.

حاسس شخصيتي ضعيفة. أبويا قال لي لازم يبقى لي كيان، وأنا مش عارف أعمل ده إزاي. كل حاجة بفكر فيها ممكن حاجة تبوظها. في تالتة إعدادي كنت عايز أخش مدارس WE، لكن جبت مجموع قليل. دخلت ثانوي وقلت هدخل تربية قسم تاريخ، وفي الآخر جبت مجموع صغير وشلت مادة.

وأبويا بيقارنني بابنة عمي عشان هي جابت نفس مجموعي، بس أكبر مني بسنة، واشتغلت في شركة تسويق عقاري. هو بيقول إنها بتسعى وأنا لأ. وأنا مش عارف أكون إيه، ولا أبدأ منين.