واقعة في فخ مع راجل غامض في شغلي

أنا وقعت في فخ مشاعري مع راجل غامض ومثير للجدل في الشغل

اربعيني ثقافته مش طبيعية بيكلمك في علم نفس فلسفة، تاريخ سياسة تربية أطفال مقارنة أديان عقائد اسلامية وغيرها موسوعة ماشيه على الأرض في الشغل دقيق لكن في حياته… غموض أسود

بيشوف العيوب أسرع من أي حد وبيقدر يهدم أي فكرة من أول جملة. مش بيصدق اي حاجه لمجرد انها اتقالت مثير للجدل. ساعات يسودلك الدنيا ويقفلها وساعات يزرع فيك امل بقوة

دورت عليه على السوشيال ميديا… لقيت مفيش أي حاجة! فيسبوك فاضي، لا اصحاب ولا بوستات ولا صور ولا اي حاجة وعامله مفتوح لكل الناس ومفيش ناس ! واتساب مفيش صورة ولا حالة… وجوده أونلاين شبه معدوم. سألت نفسي: هو بيخبي إيه؟ وليه متعمد يختفي كده؟

المفاجأة… اكتشفت إنه متجوز لكن مفيش أي أثر لمراته أو لحياته الشخصية… ولا صورة، ولا معلومة، ولا حتى تلميح. والأغرب… سمعته بيتكلم مع حد من الشباب عن التعدد وكأنه شايفه عادي جدا وحلال

قصصه دايما ناقصة: "سمعت، رحت، شوفت، سافرت، حد صاحبي، حد زميلي" طب فين الناس دي ؟ مين هم؟ الاجابات دايما ناقصة مش واضحة

قربت منه أكتر… لقيته بيقدم المساعدة في الشغل من غير ما يطلب حاجة، لكن عن حياته؟ يتهرب، يغير الموضوع، أو يقول أي كلام وخلاص.

مزاجه متقلب نظرات مليانة أسرار اختفاء مفاجئ حزن وسكوت من غير سبب ويقطع مع كل الناس وفجأة هزار وكلام كأنه شخص تاني

المشكلة… أنا مش بس فضولي اللي اشتغل، أنا فعلًا اتعلقت بيه. وبقيت حاسة إني عايزة أقرب أكتر… لكن كل ما أقرب، الغموض بيكبر. اعمل ايه ؟ وهو كده ليه ؟