ازاي اتأكد من حبه ليا؟

هل الكلمات كفايه؟ هل نظراته ليا كفايه؟ هل شغله ليل و نهار عشان يحوش و يتقدملي كفايه؟ هل غربته بعيد عن اهله عشان شغله كفايه؟ هل رغبته الدايمه في انه يشوفني كفايه؟ هل شوقه ليا و رغبته في انه يكلمني طول الوقت كفايه؟ دعمه ليا طول الوقت سواء في مواقف اجتماعيه او ماديه كفايه؟ محاولتي اني اسيبه اربع مرات و في كل مره هو كان بيتمسك بيا و يدوس علي نفسه و يحاول يقنعني اننا نفضل مع بعض كفايه؟

طبعا اي بني ادم طبيعي بيعمل كده يبقي فعلا بيحبك حتي انا كنت فاكره كده لحد ما طلب مني اني ابعتله صورة ليا بس من ورا و انا لابسه و كله تمام و لما كنت برفض كان بيضايق و يعمل مشكله و اقوله انا من حقي اني ارفض او اوافق انت متضايق ليه يقولي انا مش متضايق يروحي و انت فعلا معاكي حق انا اسف بس يرجع و يتكلم بنفس الطريقه و يطلب نفس الطلبات الغريبه تاني و انا ارفض او احاول اغير الموضوع و هو يغير الموضوع واقوله انا مش هاجي معاك بالزن و عمري ما هعمل حاجه انا مش عايزه اعملها او غصبن عني حتي يقولي صح انتي مش مجبوره بس مش كل ما اطلب حاجه تقوليلي لأ؟!!

دلوقتي هل انا بحبه؟ اه جدا و اخاف اني اضعف و دي طبيعه الانسان انه طول ما الفكره مطروحه قدامه ف طبيعي انه في وقت معين ممكن يضعف، بس الفكره اني الفتره الاخيره قفلت منه بسبب القصه دي اعمل ايه و انا مش من النوع اللي بيعمل ديدلاين و كده لو هسيبه و امشي ف لازم علي الاقل يكون عارف و اوضحله سبب الانفصال.