ليه لازم تروح الجيم

كنت بشكي لصحبي على ضهري اللى بيوجعني بسبب القعدة الطويلة على الكمبيوتر .. قالي طب ماتجرب تروح الجيم .. قولتله يعني علشان اعالج ضهري اتعب أكتر .. قالي مش هتخسر حاجة .. طنشت كلامه .. وبعد مدة جسمي كله بدأ يوجعني .. كتفي وضهري ورقبتي حتى رجلي .. قولت مش هخسر حاجة لما اجرب

روحت أول يوم والكوتش قالي على التمارين اللى اعملها .. عملتهم وخلص اليوم .. تاني يوم صاحي جسمي كله متكسر .. المشي بقى صعب عليا حتى لما ارفع معلقة السكر الصغيرة ايدي بتوجعني .. روحت لدكتور .. قالي انت روحت جيم ولا حاجة قولتله اه كانت اول مرة امبارح .. قالي الألم اللى عندك الم عضلات يا اما تكمل في الجيم يا اما تاخد الكريم ده .. قعدت افكر في الموضوع وقولت لنفسي ليه مكملش .. وفعلا مخدتش الكريم وكملت

الموضوع كان صعب لدرجة اني كنت بشيل البار فاضي ومش بقدر اشيله من الألم ومرات بعمل التمارين من غير البار حتى .. بعد اسبوع تقريبا الألم راح .. بدأت العب التمارين بأوزان وأوصل للفشل العضلي .. الموضوع كان متعب بس ممتع بطريقة غير طبيعية .. يوم ورا يوم بزود أكلي وأوصل كل مرة للفشل العضلي وجسمي بيزيد كتلة عضلية .. ومن غير وعي مني الألم بتاع ضهري راح

في يوم كانت فيه مشاكل كتير وكنت متضايق .. ميعاد الجيم جاه ومكنتش عايز اروح بعد تفكير قولت اروح وخلاص .. خلصت الجيم وانا طالع خلاص .. كنت بفكر وعايز اتضايق بسبب المشاكل اللى هرجعلها .. مش عارف .. مش عارف اتضايق فعلا .. انا حاسس اني مبسوط ومش عارف الإحساس ده طلع ليه مع اني تعبت في الجيم

انا في الجيم بقالي ۳ سنين .. ممتن لأي شخص قالي أنزل الجيم و العب رياضة .. دلوقتي بقت جزء من يومي رايح حابب المكان .. هدوء و كله بيساعد التاني و بنضحك في وش بعض مع ان محدش يعرف التاني أصلاً .. علاقة صافية بجد .. حتي لو جسمي تعبان بنزل بردوا .. غير أكلي اللى بقا صحي وغير حاجات كتير .. الجيم بحسه نموذج مصغر للحياة .. علشان توصل لهدفك هتتعب وتمنع نفسك من حاجات بتحبها

هقولك كام نصيحة كدا .. انزل جيم علشان انت محتاج ده فعلا مش رفاهية .. جسمك و نفسيتك هتتحسن و هتقابل ناس محترمة جدا الموضوع صعب في الأول بس كمل .. متروحش جيم مكس .. أولا علشان حرام ثانيا علشان هتشوف كمية سمبنة تكفي مصر عشرين سنة محدش بيساعد التاني وكله عايز يعرض نفسه ف إشتري دماغك .. حصن نفسك ب اذكار الصباح والمساء ومتسألنيش ليه