بالنسبة للتحرش ، مترميش مشاكلك علي شكلك

شوفت بوستس كتير اوي من نوعية "لو هو وسيم يبقى فليرتنج، انما لو انسل يبقى تحرش" و الحقيقة انه مش كده خالص، البنت أو حتى الولد بيتضايق من أي حد بيتعدى على حدوده و مساحته الشخصية، أياً كان شكله أو وضعه الاجتماعي. بس مش دي النقطة اللي عايز اتكلم فيها دلوقتي، النقطة الأهم هنا الموافقة الموضوع مش في شكلك ولا في وضعك، الموضوع في هل الشخص التاني مرتاح وموافق إنك تتعامل معاه بالطريقة دي ولا لأ. الموافقة دي مش حاجة مفهومة ضمنياً، ومش حاجة نقدر نفترضها، دي لازم تكون واضحة وصريحة. يعني لو حد ضحكلك أو كان لطيف، ده مش معناه إنه عايز يفليرت معاك . ولو حد بيكلمك كويس، ده مش معناه إنه فتحلك الباب إنك تكسر المسافة. أي تعامل خارج الحدود العادية محتاج موافقة صريحة وواضحة، مش تفسيرات من دماغنا. الفرق الحقيقي مش بين وسيم أو لأ، الفرق بين اللي فاهم يعني إيه موافقة وبيحترم الناس، وبين اللي شايف إن ليه الحق يعمل اللي هو عايزه من غير ما ياخد إذن. افتكر ديما إن نفس التصرف ممكن يكون مقبول جدًا لو الشخص التاني مرتاح وموافق، وممكن يبقى مزعج ومرفوض لو مفيش موافقة مش عشان انت وسيم أو قبيح لأ عشان الشخص التاني حر يختار مين يعبر حدوده و مين لأ ، و اتمني كلامي ميتفهمش غلط ، بس اعتقد الناس اللي بتفهم هتعرف النقطة اللي بتكلم فيها كويس. و فيه نقطة أخرى انت كراجل لو جالك واحدة مش يور تايب و مش شايفها جميلة و حسيت انها بتقرب منك شوف هتعاملها ازاي كأنها طفيلي ، علي النقيض بقى لو بنت حلوة و يور تايب و قالتلك بس ازيك شوف بردو هتعاملها ازاي ف بلاش ازدواجية في المعايير.

تنبيه هام : التحرش فعل دنيئ و غير مقبول تماما قولا و فعلا و الشخص المتحرش ينقصه المقومات الأساسية لأنه يكون بني آدم .