دخلي حوالي ١٠,٠٠٠ دولار في الشهر

في الأغلب هندم علي البوست ده، او هتشتم كتير، او هيتم التشكيك فيا...

بس هكتبه من اكاونت جديد، يمكن في حد فعلًا يستفاد من ده...

زي الtitle كده ما بيقول، انا بشتغل اونلاين من حوالي ١٣ـ ١٥ سنه (انا ٣١ سنة)

واه بدأت بدري نيك.

طبعًا في البدايات دخلي كان بيبقي صفر، ٥٠ دولار، او ١٠٠ دولار...

وأفضل الشهور كان بيبقي ٥٠٠ دولار...

فوقتها طبعًا ده كان كويس جدًا، كنت بساعد في البيت، وبدفع مصاريفي ودروسي والحاجات دي،

بس اخل ٧-٨ سنين دخلي زاد بشكل كبير فشخ،

واخر ٤-٥ سنين مثلا دخلي حوالي من ٧-١٢ الف دولار في الشهر،

شغلي كله من البيت، اونلاين، وكله بره مصر والعرب

انا ليه كاتب البوست ده؟

عشان لو حد بيفكر هل الشغل الأونلاين بيجيب فلوس ولا لأ. يتأكد ان اه.
ولو حد مش عارف يبدأ يتعلم حاجة ولا لأ، يتأكد ان اه ابدأ اتعلم.

طيب ابدأ اتعلم ايه؟

مش هتفرق، بجد مش هتفرق، كل المجالات فيها فلوس وفلوس كتير.
فيديو ايديتنج، برمجه، ماركتينج، سايبر سيكيوريتي، كريبتو، الخ

فمتسحلش دماغك، مفيش مجال هيكون هو ده السر في نجاحك،

اختار المجال اللي تقدر تقعد تتعلمه، انا مثلا بكره الديزاين، مقدرش اقعد اختار الوان والحاجات دي ١٠-١٥ ساعه في اليوم، ف اه هبعد عن الديزاين،
لكن مش عشان مفيهوش فلوس. بس عشان مش حابه

فلو اختارت المجال ده لمجرد ان في ناس تانيه بتعمل منه فلوس، هفشل فشل زريع. مش هقدر اطور نفسي فيه ابدًا.
ومتفكرش ان "لا اكيد لو في فلوس هتعلم اي حاجة"

لأ، ده هيبقي في الأول بس، بعدها هيجيلك اكتئاب...
لأننا بنتكلم انك تبقي elite ده معناه ايااام بدون نوم، وتعب كبير.

فلازم علي الأقل يبقي في حاجة مستحمل تسمع عنها.

فنصيحتي ليك انك تختار المجال اللي تقدر تقعد تشتغل وتتعلم عنه ١٠ ساعات في اليوم،
المجال اللي تقدر تبقي مميز فيه.

لأن مش معني ان الفلوس موجوده انها سهله، واي حد هياخد كورس هيعمل ١٠ الاف دولار، لأ.

لازم تبقي شاطر، وشاطر جدًا.

بس مش شاطر بس في مجالك، لأ ده مش كفايه،

هل انا محتاج ١٣ سنة عشان اعمل الفلوس دي؟

لا طبعًا، انا كنت صغير، ومحدش بيقولي اعمل ايه، ومكنش في كل المعلومات دي اونلاين والكورسات والAI
فأغلب السنين دي انا "بحاول"، ومن الاخر "بستهبل"

لكن مجرد ما خدت الموضوع جد، في اقل من سنة كنت بعمل مثلا ١٠٠٠ دولار في الشهر

ازاي عديت ال ١٠٠٠ في الشهر؟

لحد من ٤ سنين مثلا (قبل ما دخلي يزيد فشخ)، كنت بعمل حوالي ٢٠٠٠ في الشهر،

عارف ايه اللي اتغير؟ بطلت ابقي فريلانسر،
بطلت اعمل شغل للناس واخد فلوس مقابل ده،

وابتديت ابقي انا البيزنس اونر، وابيع انا منتجاتي، وانا اhire ناس تشتغل تحتي، واعمل اعلانات، الخ

ساعتها بس دخلي زاد بشكل كبير...

هل ده معناه بلاش تبقي فريلانسر؟ لا طبعًا. دي اول حاجة لازم تبدأ بيها...

دي اللي هتجيبلك فلوس عشان تقدر تستثمرها تاني في كورسات اكتر، وتطور من نفسك...
ودي اللي هتديك خبره اكتر في مجالك وتطورك...

بس لو فضلت تطور نفسك فقط في مجالك، دخلك هيقف.

يعني لو انت مبرمج مثلًا، مينفعش تفضل طول وقتك بتتعلم برمجه وتطور نفسك في البرمجه...

ده مش كفايه،

لازم تبدأ تتعلم business, negotiating, branding, running ads/media buying / copywriting

بس فكك من بتوع هلس التنمية البشرية والحاجات دي...

خليك في الكتب، ممكن مثلا تسيرش علي "best sales books"

واقرا الكتب اللي هتطلعلك...

اهم حاجة تتخلص من فكرة "في كتاب سحري هو اللي هيعلمني"
"في مجال سحري هو اللي فيه فلوس"
"في معلومة سحرية لو عرفتها هبقي غني"

كل ده هيعطلك، انا معتقدش في حاجة في اللي انا بعملها سر او محدش يعرفها.

الفكرة بس اني بطلت "افكر" وبطلت "ادور علي السر"
واشتغلت، كتير، اوي...

the more you work, the luckier you get.

حاليًا انا دخلي حوالي ١٠ زي ما قولت،
وفي خلال ٣ شهور اتوقع هيوصل ل ٣٠
ومش انا بس، انا ليا صحابي كتير فشخ، بيعملوا ارقام شبه كده او اكتر،
اللي هندي، واللي من الفلببيين، اليمن، وكل الدول اللي ممكن تتخيلها...

هل انا كاتب ده عشان اتمنظر مثلًا؟

لأ، لو كنت عايز اتمنظر، كنت هكتب من الأكاونت بتاعي، او اكتب ده علي الفيسبوك،.
بس محدش فيكم يعرفني، ولا انا اعرفكم.

بس انا كاتبه عشان بجد اوقات كتير بنبقي محتاجيين نسمع الحاجات دي،
وانا اللي خلاني ابدأ الرحلة دي، كان بوست زي ده...

انا ليه مكتبتش انا بشتغل ايه او بعمل ايه؟
عشان مش عايز حد يحس ان هو ده المجال اللي فيه الفلوس بس،

ايه الأثبات اني بعمل الأرقام دي؟

ولا حاجة، فعلا مفيش اثبات ينفع اقدمه، هيخليك تصدق لو انت مش عايز تصدق.
انزل سكرين شوت؟ عادي ناس هتقول فوتوشوب (واه عادي بتحصل)
انزل فيديو؟ نفس الكلام

بس انا معنديش سبب يخليني اكدب، لكن لو انت مش مصدق، حقك.

هل اقدر اساعدك؟
اكيد لو محتاج تسأل علي حاجة اتفضل في الكومنتات،
بس انا معنديش اي حاجة ابيعهالك، معنديش كورس تشتريه، مش بشغل فلوس حد، مش باخد فلوس من حد، مش بقابل حد.

ولو عرضت عليك اي حاجة من دول، يبقي الاكاونت اتهكر وده مش انا، لول.

اخر شيء، اسف لو البوست مش منظم، انا مفكرتش قبل ما اكتبه،

وأكيد اي حد عنده سؤال، يتفضل