لما فيديو العسكري السعودي والمعتمر المصري انتشر، ناس مصريين كتير طلعوا يقولوا إن دي حادثة فردية و بلاش نشر فتن.
بس الحقيقة إن في كذا مقطع في الفيديو ده بيظهر وقائع مختلفة، لعساكر مختلفين، مع معتمرين من جنسيات مختلفة، اغلبهم ستات والكل بيتعامل بنفس الطريقة اللي اتعامل بيها المعتمر المصري: العنف، والإهانة، وضرب الناس اللي جاية تعبد ربها، بحجة "تنظيم الزوار".

يعني باختصار، لو إنت رايح تعتمر أو تحج، حط في حسابك إنك ممكن تتعرّض لنفس اللي حصل للناس في الفيديو مع العلم ان دي المواقف اللي اتصورت بس و انتشرت و ما خفي كان اعظم، يا إما تسكت وتتهان قدام أهلك أو أسوأ أهلك هما اللي يتهانوا قدامك، يا إما تتكلم وتتعاقب زي المعتمر المصري ما اتسجن و السعاودة هيطلعوا يهللوا للعكسري اللي هيقل منك، و هيعتبروه بطل قومي بيحافظ على النظام،
وطبعًا المصري اللي ساكت وراضي بالإهانة، بيأكد نفس الصورة اللي هما شايفينها عن المصريين إنهم "همج" ومابيحترموش القوانين، رغم إن الفيديوهات باين فيها إن اللي اتضربوا ستات مش مصريات أصلاً واضح من اللبس، وواضح إنهم مش دايما بيتواجدوا في أماكن ممنوع فيها الجلوس، بالعكس، واقفين قريب من الكعبة.

يعني العنف ده مش حالة فردية، ده للاسف طريقة عند بعض العساكر "لتنظيم" الحجاج و المعتمرين طريقة همجية اقرب للبلطجة، و للاسف طريقتهم دي بتلاقي ترحيب و تهليل من السعاودة والأهم واضح من بعد القبض على المعتمر المصري و تمادي العساكر و تطاولهم و تكرار استخدامهم العنف مع المعتمرين و الحجاج أنه كمان الدولة بترعى النوع دا من التصرفات والا مكنش من أمن العقاب أساء الأدب 

حفظ النظام بقا بالتطاول و تطويل الايد