رح تتجرد من مبادئك مقابل مصاري؟

اليوم كان ناقصني كم غرض من الصيدلية ورحت اجيبهم ، صادفت روحتي مع مندوب ادوية كان متواجد هناك (ما كنت قاصدة اتسمّع بس صوتهم عالي) كان خلاصة حديثه مع الصيادلة هناك انه "بيعوا هاد المنتج وهاد خلوه لبعدين ، هاد المنتج طوّل عندكم بلشوا فيه ، هاد بيعوه بهاد السعر" بمعنى انه ما كان يطلب منهم يبيعوا على اساس جودة المنتج او حاجة المريض الفعلية ومدى استفادته من المنتج هاد كان هدفه استهلاك فقط ، الاشي منطقي لانه اكثر من مرة لما كنت اروح عشان يساعدوني بمنتج لبشرتي يعطوني منتجات بحياتي ما سمعت فيها وانا بكون باحثة من قبل وعارفة المنتجات الكويسة وتجارب الناس ف لما اطلب منهم منتج مشهور ومعروف وفعليًا قادر يحل مشكلتي لازم يقعدوا يطلعوا فيه عيوب ويعطوني اشي بديل ودائمًا ما بفيدني بس بخسر مصاري فصرت اطلب منهم المنتج بالاسم واذا ما اعطوني وحاولوا يلفوا ويدوروا بطلع من الصيدلية كلها (مش تعميم ولكن عدد كويس نفس الاشي)

نقطتي كلها انه لازم تخاف ربنا بشغلك ووظيفتك ولا تخسر مبادئك وقيمك وتفقد جوهر شغلك وهو افادة الناس! عشان تكسب كم قرش ، النظام الرأسمالي الي قاعدين بتعملوه حرام والناس ما بتجيب مصاريها عالبارد المستريح .