زي النهارده… من 8 سنين تقريبًا، سنة 2017، حياتي اتغيرت بالكامل.

أنا عمري ما كنت من الناس اللي بتحب تعرض حياتها على السوشيال ميديا، لا تفاصيل ولا أسرار.
 الصورتين اللي نزلتهم فرق بينهم حوالي 8 سنين… صورة وأنا في أولى ثانوي في قمة المراهقة والتهور، وصورة بعد التخرج  من الهندسة والتوبة… وبعد ما مريت بتغييرات كتير، منها الصعب والمؤلم 

كنت في قمة المزاج، بس في الحقيقة كنت أسوأ نسخة من نفسي
كل همّي أعيش وخلاص… بضحك على نفسي وبقنعها إني ذكي وأنا ظلوم لنفسي 

مكنتش بصلي غير الجمعة، وبالكاد أروح المسجد 
كنت بتاع بنات، ودخّنت فترة
كنت إنسان ماشي ورا شهوته بلا رقيب ولا حساب

الشخص اللي في الصورة التانية هو نفس العاصي اللي في الصورة الأولى…
بس بعد مراحل توبة طويلة.
أكيد مش مثالي، ولا عمري هستغفر عن تقصيري… بس المهم إني مكمل ومش ناوي أرجع

------

زمان كانت حواليا شلة ما تسبنيش أقعد في البيت ربع ساعة. لعب، سهر، هزار، خروجات، فرفشة مزيفة…
أول ما قررت أتوب… الناس بدأت تختفي واحد ورا التاني، لحد ما لقيت نفسي لوحدي.

بعد كده، ربنا رزقني بناس تانية… مش كتير، ومش أقرب أصحاب في الدنيا… بس ناس بتشجعني على الطاعة وبتفكرني بربنا نحضر دروس / ندوات دينية / نصلي / نروح الجيم 

ناس أحب أقعد معاهم وأنا مطمئن إنهم لو اتسألت يوم القيامة عن صحبتي، أتشرف إني كنت معاهم

هل بضعف؟
آه… بضعف لكن كل ما بحصن نفسي بالعبادات والطاعة  ربنا بيلهمني قدرة الصبر علي الابتلاء  و نعمة الابتعاد عن المعصية 
طب بعمل فيها شيخ؟
لا والله… أنا أقل من كده بكتير

طيب بتنصح ليه وبتتكلم في الدين ليه؟
عشان أنا عارف إحساس العاصي بعد التوبة عامل إزاي

إحساس إن في وقت ضاع… وعمر ضاع في الحرام واللعب.
حد يقول: “بس أنت كنت صغير”
لأ… ده كان عز شبابي وقوتي، وكان قدامي أمشي طريق تاني صح، وأنا بإيدي اخترت الغلط

وعارف لما تتمنى كل واحد في غفلة يفوق؟
مش علشان تبان شيخ… لكن علشان محدش يضيع زي ما إنت ضيعت

بفضل الله، قدرت أكون سبب في توبة اتنين من شلة زمان، وده لوحده نعمة كبيرة.
ورغم الابتلاءات اللي بمر بيها، عندي يقين كبير في ربنا.

أنا اتحركت. خدّت خطوة.
إنما اللي يفضل مستني الهداية تجي له لحد عنده… هو بيضحك على نفسه.

كل مرة ييجي لك جرس إنذار وتعمل له “تخطي”… لحد ما توصل لمرحلة تبقى مسلم في البطاقة بس…
عايش، بس ميت من جواه…
ولا ضامن دنيا ولا آخرة.

لسه عندك فرصة… دلوقتي قبل بكرة

اتغير عشان نفسك
يوم الحساب محدش هينفعك… لا أهلك ولا أصحابك
هتبقى لوحدك قدام أعمالك، وكل ذرة هتتحاسب عليها.
لسانك، عينك، إيدك، رجلك… كله هيشهد عليك.

الموضوع مش معقد..
قرب من ربنا بجد… ومش وقت الأزمات بس… طول الوقت.
ربنا مش عايز منك رهبنة، بس يستحق منك الطاعة والخضوع.

الحرام دايمًا سهل… ومزين… وبييجي معاه ألف مبرر
بس اسأل نفسك:
لو عرفت إن ممكن تموت بعد ساعة… هتقول نفس الأعذار؟

اللي فات مش هيرجع…
بس اللي جاي ممكن يتغير… والوقت الوحيد اللي تملكه هو دلوقتي

لو سألت الشخص اللي على اليمين وقالوله: ده أنت زمان؟
هيقول: استغفر الله… بلاش تفكرني

ولو سألت اللي على الشمال وقالوله: ده أنت بعد التوبة؟
هيقول: فكك مني 

ولو سألتني أنا…
هقولك: الاتنين أنا…
والفرق بينهم… قرار واحد.

موقف واحد خلاني أعيد حساباتي…
لما سعيت… كنت لوحدي…
مليون مرة كدت أضعف وأرجع… لكن ربنا كان بيشدني لما   أقرب أكتر  ولما أضعف أرجع تاني وتالت 

لو مكنش الموقف ده حصل…
كان زماني يا منتحر… يا غرقان في ظلمات الدنيا .. بلا هدف 

اسعى لربنا… اتحرك… ما تستناش
كل إنذار في حياتك رسالة
ما تضيعش باقي عمرك في الانتظار

ولو بدأت تتغير… أوعى تغتر
دايمًا حط نفسك موضع تقصير
وكسر كِبرها
وخليها منكسرة بين إيدين ربنا

سعيتُ فوجدت النور (بين التوبة و المعصية )