حبيت أشارككم الموقف العبثي ده اللي تحولت فيه بقدرة قادر من واحد بيصحح لفظ لغوي لـ "تكفيري" في ثانيتين، والأسماء شيلناها عشان الستر.. الموضوع كله بدأ لما صاحب البوست كتب جملة "إحنا بناخد الحلو من الدين"، فأنا رديت بتلقائية إن صياغة السؤال دي نيتها مش سليمة - لغوياً ومنطقياً - لأنك لما تقول "هاخد الحلو" ده معناه بالتبعية إن الباقي اللي سبته هو "الوحش" أو "المُر"، والدين مفيهوش وحش، فيه تكليف وفيه جهاد نفس، بس كله خير وحق، فكان اعتراضي المحدد على اللفظ لإنه بيفتح باب طعن في الدين حتى لو الكاتب مش قاصد، والغاية لا تبرر استخدام مصطلحات ملغومة زي دي.
فجأة بقا دخل الأخ المناضل اللي في الكومنتات، وساب أصل الموضوع ومسك فيا إني "كفرت الراجل" وأرهبته فكرياً! والأجمل إنه قرر يديني درس في المنطق وبيتهمني بمغالطة "رجل القش".. والمفارقة الكوميدية هنا اللي تضحك بجد إنه هو شخصياً بيطبق مغالطة رجل القش بحذافيرها وهو بيكلمني؛ لأنه اخترع موقف وهمي من خياله (إني كفرت الراجل) وقعد يهاجم الموقف ده بشراسة، مع إني مقربتش لنوايا الشخص ولا إيمانه، أنا حكمت على "النص المكتوب" ودلالته الكارثية بس.
يعني الأخ عمل "Inception" للمغالطات، بيخترع رجل قش عشان يتهمني إني بستخدم رجل القش! فياريت يا جماعة قبل ما نرفع شعارات التنوير ونوزع تهم الدوعشة والإرهاب، نتعلم نقرأ العربي الأول ونفرق بين نقد الكلام المكتوب وبين الحكم على الأشخاص، عشان اللي حصل ده قمة الكوميديا السوداء والله.

يومياتي كـ "دا3شي" على ريديت.. أو كيف تتحول من "معترض على صياغة السؤال" إلى "مُkفر" في 3 ثواني! بدون روت أحبابي في الله