مشاكل دوامي

صارتلي مشكلتين ع التوالي ف شغلي الجديد من نفس الجنسية

شغلي عباره عن خدمة عملاء ف شركة توصيل

- اول مشكلة كان في مندوب مو مداوم وقررت ادق صدري واخذ الطلبيات الي هو المفروض يوصلها الي هيه مو شغلتي من الاساس لكن قلت بقدح يمكن ينرفع شأني عندهم والمدير قالي تم ، في طلبيه وحده المفروض يكونو كرتونين ل شخص واحد لكن صار خطأ واخذت كرتون واحد

يوم وصلت عند الرجال (بعد ما حن علي وحرق جوالي عشان اجيبله كرتونه ) رحت له واكتشفت الخطأ واعتذرت منه وقلت باخذ الكرتون الان عليه مبلغ وبرجعلك المغرب وعندي الكراتين كلها قالي تم

الرجال الي راسله الكرتون ( من ذيك الجنسيه )اتصل علي وقال انه المستلم قام يشتكي عليك الانك سحبت الكرتون من يده وغلطت عليه ومن ذا الكلام

(بررت للمدير السالفه وصدقني وقالي اتصل ع الرجال اعتذر منه مع انه يخسي بس ذا مصدر رزقي ف النهايه )

- المشكله الثانيه ل حرمه من نفس الجنسيه ماكانت ترد ع جوالها عشان تستلم شحنتها ف ردت علي من بكرا صباح تسفل ف الشركة وانها مو فاضيه عشان تمسك جوالها

رحت ب نفسي وكلمتها وسفلت فيني وقلت ذا وجهي اذا مارحت وهبدتها ب كرتونها

رسلت لوكيشن محلها ورحت لها وقالتلي انت بتشيل الكرتون ل محل ودخلت المحل عباره عن محلات داخل مول ف قلتها وين محلك ب الظبط وعطتني الوصف

ومشيت وتكسرت الانه كرتونه ثقيله وجتني حرمه من نفس الجنسيه بعد شافتني من بعيد والله يعطيها العافيه قالتلي وين تبي وعلمتها الوصف وودتني لين عندها

اول مادخلت غيرت تعاملها معي صارت ابتسامات واعتذارات اخذت المبلغ حق الشحن وروحت ورحت شكرت الحرمه الي وصفتلي محلها الانه لو نفسيتي ضاقت شوي بعد كنت راح احقد حقد كلي ع ذي الجنسيه

(في اشياء حبيت ما اذكرها الانه لو ذكرتها يمكن تنمسح السالفه)