لكل المعارضين والمنتقدين الجدد:

تشبيهي للي عم يطالبوا بتطبيق معايير ديمقراطية دولية أوروبية كاملة النظام الجديد حاليا:

متل شخص كان ناطر 54 سنة علاج عقم، وأخيرًا جاب طفل خديج وضعيف ومريض، وحاطه بالحضانة ليتعالج.

بيجي جاره، بدل ما يتركه يتعافى، بدّو يعلّمو السباحة فورًا، فبرميه بالبحر، أو يطعميه أكل شارع ملوّث بحجّة “بناء المناعة”.

هيك تمامًا وضع بعض الحقوقيين العرب والأجانب (وأحيانًا سوريين) اللي عم يبالغوا بانتقاد النظام الجديد، حتى لو كنّا بنتفق معهن سابقًا على نقد النظام القديم.

نحنا مو ساكتين لأننا شبيحة جداد.

نحنا ساكتين لأن هالدولة، اللي اندفع ثمنها مليون شهيد، لساتها وليدة وهشّة، طالعة من حرب 14 سنة، وقدّامها بلد مدمّر، منقسم، ومحتاج توحيد ونفَس طويل.

الرجولة الحقيقية هي أنك توقف بوجه نظام دكتاتوري قوي مدعوم بروسيا وإيران.

أما تحويل كل الطاقة اليوم لمحاسبة نظام وليد قبل ما يوقف على إجريه، فهو جبن وخسة وتجاهل لواقع ملايين السوريين اللي ناطرين حدّ أدنى من الاستقرار والأمل الاقتصادي والاجتماعي.

شخصيًا، ما كنت من المحبين للشرع قبل التحرير.

بس اليوم، ومع تركيز الدولة بشكل واضح على القضايا المدنية والاقتصادية، تأمين الأساسيات، إعادة الإعمار، وفتح الأبواب الدولية، فأنا سعيد أن البلد أخيرا عميمشي للأمام بدل الرجوع للخلف.