ليش الخوف من "العين" عندنا تحول إلى "هوس" وتوتر اجتماعي؟

يا جماعة الخير، ودي أطرح موضوع نعيشه يومياً في مجتمعنا، وهو موضوع "العين والحسد". طبعاً كلنا مؤمنين إن "العين حق"، وهذا شيء مفروغ منه، لكن اللي محيرني هو حالة التوتر والتحسس الزايد اللي صرنا نشوفها، لدرجة إنها أثرت على علاقاتنا الاجتماعية وصارت تسبب مشاكل بين الأهل. ​مواقف من الواقع خلتني أستغرب: ​التكتم المبالغ فيه: صار الواحد منا إذا خطب، أو اشترى سيارة، أو حتى نجح، يعيش في حالة استنفار. أكيد من حق الشخص الخصوصية، لكن ليش العصبية والزعل لو أحد درى؟ ليش الموضوع يوصل لخناق؟ ​موقف عمي: عمي إنسان ملتزم، كان يكلم أبوي بموضوع خطوبة ولد عمي، وأختي بالصدفة سمعت السالفة وعلمت أقاربنا. لما درى عمي، قلب الدنيا وسوى مصيبة وزعل كبير في جمعة أهل! السؤال هنا: ليش العصبية ذي كلها؟ كان ممكن الموضوع ينحل بكلمة طيبة وبدون هالتوتر، بالنهاية إحنا أهل وما بينا إلا الخير. ​موقف أخوي: أخوي اشترى سيارة جديدة، وصار يهدد "لا أحد يصور" و "لا أحد يتكلم"، ولو بس تمزح معه يزعل ويتوتر بزيادة. الخوف من العين موجود ومقدر، بس ليش يوصل للتهديد وتخوين أقرب الناس لك؟ ​تجربتي الشخصية وتسلسلي مع الموضوع: أنا فعلاً مريت بفترة كنت أحس فيها بضيق، وكنت أحس إن فيه شخص حاسدني، وكان شعور مروع وصعب جداً. لكن لما بدأت أهتم بصحتي وأعدل أكلي، بدأت أحس بارتياح نفسي تدريجياً. ​سؤالي لكم يا شباب وبنات: ​ليش مجتمعنا صار "حساس" بزيادة من موضوع العين لدرجة التوتر الدائم والهواش؟ ​هل العين لها تفسير أو إثبات علمي (طاقة سلبية مثلاً)؟ ولا هو مجرد تأثير نفسي وتوفيق من الله؟ ​كيف نوازن بين الخصوصية وبين إننا نعيش حياة طبيعية بدون ما نؤذي مشاعر اللي حولنا بالعصبية والشك؟