اغاني طفولتي

انا جدا سيء في تذكر الماضي فعادة استعين بامور تساعدني على التذكر ومن هذه الاشياء الموسيقى. فيه مجموعة من الاغاني كل ما اسمعها ارجع اتذكر الاحداث والمشاعر اللي مريت فيها في لحظات طفولتي( من عمر7 الى 9)، بذكر بعض من هذه الاغاني في ذا البوست

dango - كانت تشغلها لي اختي الكبيرة احيانا عشان تخليني انام، مشاعري ملخبطه لكن اعتقد اقدر اصفها بالهدوء بعد الحزن، اتوقع نفس الشعور اللي يجيك بعد ما تخلص بكاء

سألوني الناس - للحين كل ما اسمعها يجيني شعور كآبه مو طبيعي، صباح اجازة الصيف الطويلة جدا جدا جدا، الساعة 7 الصبح والكل نايم, بالمطبخ اختي مشغلتها بينما انا العب robbery bob(لعبة الحرامي) ما اذكر تفاصيل فجر ذاك اليوم لكن من كثر ما هي تعيسة الى اليوم كل ما اسمع سألوني الناس اشعر بشعور مخيف وحزين جدا.

اغنية ناروتو حزين - في طفولتي بديت اتابع ناروتو، كان عندي قلب مرهف، كنت احزن على هذا المسكين اللي بدون ام او اب والكل يكرهه، ما اتذكر اني كنت ابكي لكن اذكر ان بعض الدموع تنزل وانا اسمعها.

عاش سلمان - خالي الله يرحمه مصاب بالسرطان، في اخر حياته قرروا امي وابوي زيارته والسفر له وقررت مصاحبتهم. قبل الوصول الى المستشفى ابوي شغلها لي كنت جدا فرحان لحظتها ومبسوط، كنا رايحين نقابل شخص في اخر ايام حياته(فعليا واعتقد الاهل كانوا يعرفوا المعلومة هذي) وغالبا ابوي ما وده تصير لي تروما. خالي ما كان يقدر يتكلم وكنا نتواصل معهم من كتاباته بالواتس او يكتب بدفتر ويورينا، خالي كان يعرف انه بيموت لكن ما قد شفت شخص بشوش وراضي مثله. كل ما اسمع هذي الاغنية ادعي له بالرحمه، علمني درس اتذكره في حياتي لليوم، كلنا بنموت مهما كان عمرنا، حياتي انا اللي احدد هل بخليها تعيسه او سعيدة مهما كانت ظروفي.

AoT op1 - تابعت اتاك وعمري 7، كنت جدا جدا جدا اعشقه، واحد عمره 7 يشوف العالم يتدمر من مفاصيخ، كانت افكاره جدا ناضجه مقارنه بعمري. مشاعري لما اسمع الاغنيه هي نفسها لما كنت اتحمس مع كل حلقة جديده اتابعها وهي نفسها الغموض الغريب اللي اول مره حسيت فيه بحياتي.

shape of you - كل ما اسمعها اتذكر يومياتي، العبودية اللي عشتها، سني اللي انكسرت لأني ما اطعت الmaster حقي، الحياة المتخلفه اللي كنت عايشها، قنوات اليوتيوب اللي كنت اتابعها، التوحد اللي كنت عايشه، الغباء اللي كنت اسويه. دائما اسمعها واتذكر موقف او اثنين غبي واضحك.

faded - على اطول اتذكر مقاطع"كيف تسوي ايفون 5 بالمنزل لا يفوتكم🔥🔥🔥" او مقاطع كلاش رويال، كنت دايم اتابع باس ستوب وتعلمت مره باللعبة، اذكر وصلت ساحة 6 يوم كان بس فيه 8 ساحات

اصوات فم - دايم اتذكر كل يوتيوبرز ماين كرافت، فراس قيمر كان اكثر شخص تابعته. احساسي هو نستولجيا

تنويه، اتمنى ما يجي عجوز ويزعجني انه عاصر الديناصورات وحارب بالحربين العالمية وهو اللي قتل الكبتن ماجد. ايه نعم انا ورع.