ممكن سؤال؟ (بجد مش هزار)

أنا عندي سؤال واحد بس، ولكن قبل ما حد يهاجم أو يعترض، أنا سؤالي استفسار مش انتقاص من حد و انا بعتمد الاحترام في المناقشات و بكره الشتايم جدا ف يا ريت الردود تبقى كويسه من حضراتكم.

هو ليه كل ما افتح اي صب مصري الاقي الناس في التعليقات غريبه كده و بقى فيها ايحاءات مش تمام اوي ، يعني مثلا شتايم معروف لو اتقالت قدام اي حد لسا عنده اصول او مبادىء هيتعصب ، انا بجد بيحزنني الموضوع ده جدا، و طبعا عشان محدش يقول حاجه ، تاني، ده مش استهزاء او انتقاص ده استفسار و مش بجبر حد يتكلم بطريقه معينه.

كمان نقطه تانيه، انا من اسكندرية عادي بس احيانا بطلع بره مصر و عندي صحاب في دول في الخليج كمثال، هما مصريين برضو بس مش فيهم حتة التنمر المنتشره بشكل رهيب ف مصر او الشتيمه او مثلا فيه حاجات مش هينفع نتكلم فيها و فيها حياء بلاقي ان عادي ف مصر الشباب ممكن يتكلموا عن الموضوع عادي فالشارع او عالنت،

كمان فيه حاجات كتيره بخاف منها ف مصر مثلا التحرش او الأمان، يعني كمية الجرايم اللي بنسمع عنها دلوقتي مش طبيعيه و الواحد بقى خايف على نفسه ينزل البيت لوحده بدون حد معاه ألا يحصل له مصيبه لا قدر الله في أوبر ولا جامعة حتى، انا ما كنتش بنزل اي مكان ف مصر لوحدي بس قريبا هيحصل عشان الجامعة و امي كبرت فالسن و لازم أعتمد على نفسي، القصة دي مقلقاني جدا و بقيت خايفه من الجيل الجديد و الانفتاح السيء على المواقع و كمية الافكار الغلط و قلة الوعي و الدين مرعبه. بقيت بسأل نفسي، ايه اللي جابنا لكده؟ و ازاي الواحد يقدر ينجو من الحاجات اللي بتحصل ف مصر لحد ما يطلع منها سالم (يا رب).

محدش يتهمني اني مش بحب مصر، مصر حلوه بس المشكله فيها هي العشوائية و الفوضوية، قد لا تكون افضل بلد اقتصاديا، بس فيه حاجات مأرقاني..و فيها حاجات كويسه برضو

شكرا لأي حد هيرد بإحترام، وانا بقدر ده منه و معلش لو في حاجه في سؤالي ضايقت اي حد، بس الله يصلح الحال.