سؤال للرجال اللي انفصلو قبل او اثناء الملكه

صبحكم الله بالخير

بحاول اختصر الموضوع. انا رجل تعرفت على بنت وكانت علاقتنا سطحيه لمده سنه ومع الوقت قوت العلاقه وكانت علاقتنا ببعض بشكل عام حلوه. فيه اختلافات بسيطه وحليناها بس مافي مشاكل اطلاقا. عبرت لها عن اهتمامي ورغبتي بالتقدم لها ورحبت بالامر وتمت خطبه رسميه من ثلاث شهور وعلاقتنا صارت اقوى واقوى تقربنا من بعض اكثر خططنا لحياتنا وشهر العسل وشقتنا حتى الاثاث اخترناه مافيه اي مشاكل علاقه كلها حب ودعم وانسجام وكان موعد ملكتنا بعد العيد. باخر شهر لاحظت شوية برود من جهتها وسألتها اذا فيه شي مضايقها وقالت لا ابدا سالتها اذا تاريخ الملكه ودها تغيره لان ممكن متعب بعد رمضان والعيد تحتاج وقت زياده قالت لا ابدا التاريخ تمام. اللي حصل ان قبل رمضان باسبوع تقرييا ارسلت لي رساله مضمونها ان مافي نصيب والله يكتب لك الخير. حاولت افهم منها الاسباب، اكدت لي ان مافي شي سويته غلط وانه مافي نصيب وبس.

انا في حالة ضياع فيني حزن وصدمه واحس بفراغ مو طبيعي. فقدت ثقتي بنفسي مع انها ذكرت لي اكثر من مره ان مافيني ولاعيب بس سبحان الله مافي نصيب. حتى علاقتي باهلي تذبذت ماعرف وش اقولهم. قلت لهم مافي نصيب وسألوني ليش ولا عندي رد لهم.

حتى فكرة الارتباط من جديد ودي فيها واحتاج وجود امراه في حياتي بس احس بفراغ داخلي وصدمه ولا اعرف كيف اقدر اتعامل مع الموضوع.

ياليت الاخوه الرجال اللي مرو بنفس التجربه او تجربه شبيهه احتاج نصايحكم حتى لو بالخاص لو ماتبون تذكرونها تحت المنشور.

شكرا والله يوفق الجميع لما يحبه ويرضاه