التغيير بيبدأ من عندك

فى اى دولة او قوي عظمي فى العالم الحديث هتلاحظ نمط متكرر و هو ان الدول العظمي و القوية بتركز علي بناء الانسان , امثلة زى الصين الشيوعية و الاتحاد السوفييتي و الاتحاد الاوروبي و امريكا و كندا و استراليا و كندا و اليابان و حتى امثلة جدلية شوية زى المانيا النازية او اسرائيل , سواء بتحب المانيا النازية او لا ف متقدرش تنكر انهم قدروا ينهضوا عسكريا و اقتصاديا بسرعة ضخمة بفضل ان كان عندهم ارادة حقيقية و ادارة ذكية و شعب منظم , سواء بتحب اسرائيل او لا ف متقدرش تنكر انهم قدروا ياسسوا دولة قوية بسرعة ضخمة بفضل التنظيم و الادارة الذكية و الانضباط و التركيز علي جودة الحياة و التعليم و الاقتصاد و التكنولوجيا ,

الاهم بردو ان الدول العظمي او القوية بتتجنب خالص الصراعات الطائفية و العرقية بالكامل , الاتحاد الاوروبي فيه دول بروتوستانتية و كاثوليكية الى قعدوا يحاربوا بعض عسكريا و فكريا و دينيا لمئات السنين ولكنهم ادركوا ان الصراعات الدينية و الطائفية ملهاش اى قيمة حرفيا و قدروا فى الاخر يتوحدوا فى تحالف عسكري و سياسي و اقتصادي زى الاتحاد الاوروبي , نفس الكلام مع الاتحاد السوفييتي الى فيه مئات الاعراق و الاقليات و المجموعات العرقية و الثقافية و اللغوية المختلفة و ال3 اديان ابراهيمية كلهم , يهود اوروبا الشرقية و كاثوليك فى بولندا و المانيا و مسلميين وسط اسيا و ارثوزوكس روسيا و اوكرانيا و رغم كدا قدروا عادي بتوحدوا تحت نظام واحد و يبنوا قوة عظمي مع بعضهم البعض و علي فكرة الحزب الشيوعي السوفييتي كان فيه يهود و مسيحيين و مسلميين كمان ,

دلوقتى ازاى ممكن ننهض ك شعوب عربية؟ اول حاجة لازم نبطل عقلية "المخلص" لازم متكنش حاطط فى بالك فكرة ان هيجي قائد واحد هو المخلص و هو البداية و النهاية و منقذ الامة العربية و الكلام الفارغ ده , تانى حاجة لازم نفهم ان التغيير بيجي من تحت , مفيش قائد عربي فى اى دولة عربية هيصحي الصبح و يقولك متيجي ننهض بالدولة و انما ممكن يفكر فى النهوض لو شاف شعب منظم قدامه بيؤثر فى السياسة و بيطالبه بالتغيير و لما اقول تغيير مش قصدي نعمل تظاهرات و ثورة و نطالب باسقاط النظام و لكن تغييرات بسيطة ممكن اى حكومة دكتاتورية تقبلها و تغييرات زى تحسين جودة التعليم او تنظيم اكتر للبنية العمرانية و الطرقات او فتح المجال الاقتصادي بعض الشيئ , لو حصل تغيير صغير زى ده مرة كل 5 ل 10 سنين فى خلال عدة اجيال هتكون الدول العربية نهضت و الدكتاتوريات و الانظمة العسكرية و الطائفية سقطت و الشعوب بقتت منظمة اكتر

و بردو محتاجين نبطل طائفية , عمرنا ما هننهض و الطائفية مغروسة فى عقولنا من الصغر , دول زى سوريا و العراق و لبنان و حتى مصر فيها طائفية

طائفية مؤسسية زى ان مناصب مخصصة للمسيحيين فقط و مناصب للمسلميين فقط و مناصب للسنة فقط و مناصب للشيعة فقط , او طائفية فكرية و اجتماعية ان شيخ "مسلم" او رجل دين "مسيحي" يطلع علي فيسبوك او يوتيوب و ينشر الكراهية و يقولك اصل عقيدتهم مش صحيحة و شوف بيعبدوا ايه و شوف عقيدتهم بتقول ايه و شوف و شوف و شوف , واحد زى عمرو نور الدين الى حرفيا كل محتواه عن المسيحيين ولا ذكريا بطرس الى طلع ترند من كام سنة ولا شيوخ سنة بيشتموا الشيعة او بيتقدوهم بطريقة سخرية و تقليل و ضحك علي الشيعة , يجماعة امتى هنبطل العبط ده ؟ لو متفرجناش علي الاشكال دى مش هينتشروا بافكارهم المسمومة و ياريت نبطل طائفية فكرية و اجتماعية , انت مسيحي كاثوليكي او ارثوزوكسي او مسلم سني او شيعي انت بذاتك انسان مستقل عندك العقيدة بتاعتك مؤمن بيها و شايفها طريق للتواصل مع ربنا و طريق كويس لحياة روحانية صحية ف good for you

هل في اختلاف فى العقيدة و خلافات علي قضايا تاريخية حساسة؟ دى حقيقة محدش يقدر ينكرها , الكراهية الطائفية هتموتنا كلنا و هتخلينا امة ضعيفة و منهارة للابد؟ دى بردو حقيقة محدش يقدر ينكرها

كان فى فيديو لشخص امريكي بيزور الاماكن الى فيها اكبر عدد من مؤيدي الصهيونية و اماكن فيها اكبر عدد من داعمي فلسطين و الفيديو عموما كان بيتكلم عن التطرف من الطرفين , و اتكلم عن بعض الافعال المتطرفة الى عملها مؤيديين فلسطين من المسيحيين و المسلميين و فى نفس الفيديو الشخص ده زار مسجد و اتكلم مع الامام و الامام قال جملة واحدة التعليقات علي الفيديو كررتها كتير ك اهم جملة فى الفيديو, الامام قال "they are just fake Muslims and Fake Christians"
اكيد مش بيقصد ان دعم فلسطين فيه شيئ غلط بالعكس ده واجب انساني ولكن لما تعمل افعال متطرفة انت كدا مش بتنصر فلسطين بالعكس ممكن بعض مؤيدي الصهيونية يستخدموا افعالك دى ضدك و ضد فلسطين , المشروع الصهيوني مش مجرد مستطونات و جيش و و حجة دينية "ركيكة" انما الحركة الصهيونية كانت مشروع دولي شامل و فيه اجنحة اقتصادية و فكرية و عسكرية و سياسية , و المشروع الصهيوني مش هينتهي الا بحركة/مشروع مضاد/ة بتستخدم نفس الاساليب

لازم بردو ننهض فى شغلنا و تعليمنا و مش قصدي نعتمد علي التعليم الحكومي لاني عارف انه ضعيف و عبارة عن حفظ ولكن اقصد التعليم الذاتي , ابحث عن اهم 100 موضوع علمي فى كل مادة و ذاكرهم حتى لو بشكل سطحي , افتح كتب التاريخ و افهم ازاى الحضارة الانسانية اتطورت و نشات علي مدار ال10000 سنة الى فاتوا , اتعلم عن الاداب و الاخلاق العامة و السلوكيات لاننا للاسف بنعاني من ازمة ضخمة فى الموضوع ده فى الوطن العربي كله عموما , و نتعلم عن حقوق المراة و الطفل و حقوقك انك ك فرد و اتعلم عن العلاقات الاسرية و العاطفية و الصداقة و يعني ايه علاقة و يعني ايه جواز و يعني ايه صداقات و يعني ايه مشاعر لاننا بردو للاسف بنعاني من ازمة ضخمة فى موضوع العلاقات و السلوكيات ده

ننهض فى الشغل عن طريق اننا نطور مهارتنا و خبراتنا بشكل مستمر و مستدام و نشتغل بجد و بنظام و ناسس شركات صغيرة و مشاريع و تعاونيات و ندير فلوسنا بشكل ذكي و كل فرد يقدر ينظم شغله و مهاراتته و خبراته بحيث ان يكون عنده شيئ قيم يقدر يقدمه للناس بمقابل مادي

و بردو لازم نعيش فى تجمعات مع بعض 10 ل 20 شخص يستقروا مع بعض فى منطقة او شارع محدد و يعملوا عقد اجتماعي مع بعض , كل فرد يدعم الفرد التاني و كل فرد يقف ورا اخوه فى المجموعة و يدعمه لو اتعرض لاى ازمات من اى نوع غير توزيع المخاطر , لو واحد بقي مديون ب 10000 جنيه بشكل مفاجئ ف ممكن المجموعة يدعموه بحيث ان 20 شخص يدفع 500 جنيه , لو شخص اتعرضت لمشكلة مع ضابط او بلطجي , ف المجموعة كلها تقف وراه لحد ما يطلع من المشكلة دى و التجمعات دى ممكن يكون فيها بنات و رجالة مع بعض عادي و مسيحيين و مسلميين مع بعض بردو ,

الربيع العربي فشل لانه طالب بمطالب ضخمة دفعة واحدة (اسقاط النظام), الشعوب العربية كانت مدمرة من سنين من الطائفية (سوريا و لبنان و مصر و العراق و اليمن) او حكم عسكري (مصر و الجزائر و ليبيا ) او حروب لا نهائية (اليمن و الجزائر و العراق) و طبعا مكنش في تنظيمات مجتمعية زى الى بتكلم عنها ف الانظمة شافت مجتمع مفكك بالفعل مش مجتمع مترابط صعب تفكيكه و احباط اهدافه , و بالفعل المجتمع العربي تم تفكيكه و احباط اهدافه ! مصر بقي فيها حكم عسكري اسوء 100 مرة و سوريا و ليبيا و اليمن دخلوا فى حروب لانهائية و تونس نشأ فيها نظام هش ركيك و رجعت للدكتاتورية تاني فى 2021

وانا عارف ان الجزائر و العراق لم يشاركوا فى الربيع العربي ولكن انا بكلمك ان للاسف الشعوب العربية كانت مفككة و مشتتة سواء بعد او قبل الربيع العربي و سواء شاركت ام لم تشارك فى الربيع العربي

التغيير بيبدأ من عندك انت , المهم انك تكون انسان منظم و عندك تعليم رسمي بجانب التعليم الذاتي و خبرات عمل و مهارات و ذكي فى ادارة اموالك و تعيش فى تجمعات منظمة مع اصدقائك او قرايبك و تبقي شخص ذكي اجتماعيا و عاطفيا و تكون عارف و فاهم العلاقات الانسانية بشكل كويس و يكون عندك سلوك و اخلاق و اداب عامة كويسة و تبطل فكر طائفي تماما , و فى وقت الفوضي او التظاهر او الثورة انت تبدأ تحدد مطالب واضحة و بسيطة اى حكومة دكتاتورية ممكن تقبلها و المطالب دى لو اتحققت ممكن تعمل تغيير بسيط للافضل و لو العملية دى اتكررت مئات المرات علي مدار عدة اجيال فى جميع الدول العربية ف ده هيكون تغير حضاري شامل فى الوطن العربي و ممكن يؤدي للتحول الديموقراطي فى يوم و النهضة بالامة العربية