هل هي بتخلع بشياكة ولا انا ظلمتها ؟

من فترة كده حوالي سنتين عرفت بنت كده من بعيد ل بعيد كنا بنتكلم كل فترة (مش سوشيال ) و كان بينا مواقف احترام متبادل كتير لدرجة اني كنت حاسس إنها معجبة بيا و بعدها انقطعت عن المنطقة اللي كنا بنتقابل فيها فترة ف من حوالي سنة كده لقيت ماسدج على NGL بتقول فيها إني وحشتها و كده

عرفت اليوزرنيم بتاع انستا و اتكلمنا فترة بشكل مجهول (مكانتش راضية تقول هي مين) و بعدها بفترة عرفت هي مين و بقيت ببعتلها على الاكونت الأساسي بتاعها

الحقيقة أنا كنت معجب بيها جدا هي شخص لطيف و كل حاجة لكن بعد فترة لاحظت طريقة ردها مش حلوة ده غير إنها بتتعمد تأجل الشات بتاعي يومين مثلا و هي بتنزل بوستس و ستوريز عادي

بعدها ب فترة تانية قالتلي معلش اخويا عاملي مشاكل الفترة دي و مش عايزاه يعرف بيك عشان ميعملكش مشاكل قلتلها مفيش مشاكل عادي

رجعت بعدها و بعتتلي تاني تقولي أنا مكنتش عايزة الموضوع يخلص كده و إنها زعلانة بس طالما أنا مرتاح ف تمام بالنسبالها

وضحتلها اني مكانش عندي مشاكل أساسا و إن هي اللي اختارت و انا احترمت اختيارها و خلاص هي قالتلي نرجع تاني بس صحاب رجعنا نتكلم فترة تانية (مع العلم اني قلتلها إنها كان عندها مشاكل مع اخوها قالتلي لا دي مشكلتي و انا هتصرف فيها مع اني مكنتش معاها في وضع مخل يعني مش فاهم فين مشكلتها اساسا)

من كام يوم كده لاحظت نفس اللي لاحظته في الاول بتعمل عبيطة لما ابعت طريقتها في الكلام مفيهاش احترام (مرة قالتلي لما كنت بسألها عاملة ايه اني مش عارف اعيش غيرها ولا ابعد عنها و مدلوق عليها) و في الاخر خالص بعتتلي تقولي اخويا الفترة دي مراقبني مش عايزاك تبعتلي حتى الماسج دي متردش عليها

أنا أول ما شوفت ده روحت عاملها بلوك و خلاص و لقيت إنها هي كمان عملتلي بلوك

ف أنا مش فاهم طب كان ايه لزومه من الاول تبعتلي اني وحشتها و تديني اكونتها و تتكلم معايا كل ده و في الاخر تعمل كده كأنها بتطفشني يعني

هل هي بتطفشني فعلا (مع العلم إنها لما قالتلي مش عايزة اتكلم أنا متكلمتش معاها عادي) ولا هي ممكن يكون عندها مشكلة فعلا

ملحوظة :- هي مش مستقرة نفسياً بصراحة ف أنا شاكك إن ده ممكن يكون هو السبب