مشكلتي بدوامي -سالفه طويله-

هلا

قصتي شوي طويله bare with me

وموضوعي يارب مايطلع من هنا لأن احس كل الاطراف بتعرف مين انا ومره ماودي كونفلكتس زياده.

انا تخرجت من البكالوريس، بس تخصصي يبغاله دراسه "أكثر" بعد البكالوريس عشان يصيرلك قيمه.

وفيه مستويات يعني تدرس من ٤ إلى ٦ سنوات عشان تحصل شهاده تخولك تشتغل وتخلي راتبك مقبول نوعاً ما، وبعدها تدرس تخصص ادق عشان يصيرلك قيمه بسوق العمل وقيمه لعلمك.

قبل هالدراسه محد يوظفك او يطل بوجهك.

مع انه تخصص فيه نقص بالسعوديه وضغط عالموظفين.

انا دخلت تخصص مابعد البكالوريس بعد منافسه، وبديت ادرس.. اول سنه مشت تمام، الثانيه بديت اتعب، الثالثه طلع تعبي حقيقي ومرضي استدعى مراجعات كثيره، ادويه كل الانواع اللي تتخيلوها (كيماوي بيولوجي ستيرودي …الخ)

التعب كان قوي لدرجة اني اضطريت اتنوم بالمستشفى كل اسبوع يوم كامل عشان اخذ ادويه وريديه

طبعاً يأثر على جودة حياتي -بس مو على جودة عملي لأني اشتغل مع فريق كبير-

وقدر الله علي اني ارسب بامتحان السنه الثالثه لأن بدال ما ادرس، اداوم وبعدها اروح المستشفى مراجعات ورحلة علاج وتقبل أني مريضه وان حياتي كلها تتشقلب فوق تحت

انهرت نفسياً من هالاحداث و وقفت سنه ، قلت هالسنه بهتم بصحتي وارجع. اهتميت بصحتي فعلاً ! تحسنت من نواحي كثيره يارب لك الحمد.

رجعت والحمدلله بديت بدايه قويه واموري كانت زينه، لكن بديت الحين امرض زود وراجعت مع طبيبي وقال لي للأسف اللي معاك يسمونه "فشل علاجات" لما الجسم يبدا زي اللي يتعود على العلاج هذا ويطور نفسه يحارب العلاج .. لذلك وضعك ساء.

وقعد ينبش بنمط حياتي وعرف اني اداوم بمكان مره ضغط، مره حساس من ناحية انه تجيني اصابات/عدوى وكمان فيه دوام ٢٤ ساعه ٧ مرات بالشهر

فقال لي ضروري نخفف هالشغل ونبلغ قسمك.

وهذا اللي صار فعلاً. دكتوري كلم رئيس العمل حقي بعد ما ارفقت له تقرير وطلب يناقشه شخصياً .

هل قسمي تقبل وقال اوكي بنخفف بس مابنقطع دوامك؟ لا طبعاً.

هل توقعت منهم دعم؟ ايضاً لأ. لأن المنطقي الطبيعي مصلحة العمل فوق مصحلة العامل "او كذا بالمكان اللي اشتغل فيه عالأقل"

اللي صار احد الزميلات حملت "حملها الثالث" ماشاءالله تبارك الرحمن الله يتمم لها ويقومها بالسلامه.

مشكلتي ان البنت حملها عادي مافيه مشكله الحمدلله ،

لكن كونها حامل!

صار لها استثناءات .

ماتداوم باجازات العيد الرسميه (لا فطر ولا اضحى) - ماتاخذ دوام الـ٢٤ساعه ومسموح لها ماتحضر اي يوم تحس فيه انها مو اوكي .

المشكله انها صارت تستغل هالشيء وماتداوم ابداً !!!

ولو عندي موعد "ادويه وريديه" تجي سبحان الله تصير تقدم تداوم واول ماتخلص شغلها عالساعه ١٢ تسوي نفسها مغمي عليها او بتطرش "وهي بالسادس"

وصلت معها تتصل علي تسأل "عندك موعد اليوم؟؟" ولما اقول لها لأ تقول خلاص اجل برفع اجازه.

ومرات اقولها ايه تقول متى عشان تداومين لين موعدك وانا اجي استلم منك.

اللي غابنني وفاقع كبدي انها اذا داومت! تداوم مره بالاسبوع، وكل شغلها ينرمي علي!

قلتلكم ان تخصصي يبغاله تخصص بعد البكالوريس؟

زميلنا "اعلى رتبه ومسؤول عننا كلنا" جاي من تخصص جانبي ماهو ملم بتخصصنا فمعتمد علي انا ايضاً اعلمه.

اليوم تأخرت عالدوام لأن دكتوري وصفلي ادوية تنومني بعد الدواء الوريدي.

وجيت ٩:٣٠ بدل ٨:٣٠

هل تأخيري غلط؟ نعم.

هل اعتذرت عن الغلط هذا ؟ نعم.

هل وضحت له مشكلتي؟ نعم.

هل تأخر الشغل او احد تضرر من تأخيري هذا؟ لأ ابداً.

لكن هو فقد اللي يسويله guidance قبل مايجي المدير المسؤول عن شغله هو اللي كان معتمد علي اعلمه كل شيء عنه.

قام وش سوا ؟؟ بدل مايتكلم معاي ويقول لي انه زعلان من تأخيري او حطيته بموقف سيء او اي شيء من هالكلام. "بالرغم من اني جيت مع المدير على طول ماتأخرت عن المدير ابد"

راح رفع علي شكوى عند المسؤولين عني

حركه مره تقهر!

فكلموني يستفسرون وقلتلهم وضعي واني شرحت مسبقاً وجبت تقرير وبرفعه مره ثانيه لو يبون.

الغريب انهم قالولي انو "انتي مو عوايدك تهملين وتتأخرين كذا ، احنا مستغربين احد يشتكي عليك اصلاً! دايم قلقه وتبين كل شيء بيرفكت وش صاير؟"

فانا لأني تعبانه انفجرت وخريت الاكو والماكو.

فلانه ماتجي خير شر وانا اتعب وكيت كيت كيت.

المسؤولين عني صارو بوضع اللي "تبيننا نخليها تجهض يعني؟" وهذا مو قصدي ابداً

قصدي انها انسانه تستغل حملها بزياده وتمثل!

يعني اليوم اللي تسوي فيه انها دايخه وتطرش وتطيح تتسدح تطلع بدري وتسوق لبيتها بنفسها والاقيها مصوره نفسها تركب زينه رمضان بالحوش وراقيه سلم!

بينما انا واضح كل شيء فيني مريض ومقدر اسوق واحاول اجي باوبر واقطع من راتبي مبلغ الاوبر ومن صحتي و وقتي عشان اجي ! اتروش على كرسي وانام بمسكنات لدرجة اهلي رتبولي غرفه بالدور الارضي لأن ماقدر اطلع الدرج كل شوي متعب علي !

ومواعيدي كلها عندهم وتقاريري وكل شيء لدرجة احس اني نسفت ام خصوصيتي عشان يتفهمون! وبالرغم من هذا مخليني اداوم ويعاتبوني على التأخير!!!

عدم تكليفها بكل العيدين مخليني انا اتكلف بدالها بالعيدين.

عدم وجودها بجدول ال٢٤ساعه مخليني انا يزيد علي ال٢٤ساعه وتصير يوم ورا يوم.

هل معاي حق انقهر؟

هل منطقي اني جبت موضوعها؟ ولا تحسون فعلاً بينفهم اني انا شخص شرير وابيها تجهض؟؟ لأن والله مستحيل فكرت بالموضوع من هالناحيه! اعرف الحمل متعب ومجهد بس المرض كمان مجهد ومتعب ولو هي تعرف نفسها تتعب بالحمل لا تحول شغلها علي تشوفلها احد ثاني!

حاولت ايضاً اقولهم ينقلوني بقسم مافيه هي ويخلون عاهاتنا متفرقه على قسمين ، رفضو! انا مابي اشيل شغلي وشغل غيري بالذات ان العمل مو مكتبي وبس لا في شغل يدوي وفيه وقفه وفيه ميداني وجهد يعني ..

هل تشوفون ان في تفرقه ولا انا اهلوس؟؟

من حقي اطلب تخفيف نفسها مره ثانيه ولا اسكت واكمل كذا ؟ واذا جا اختباري احتمال ما انجح مره ثانيه لاني مشغوله بمرضي وشيل شغل غيري ؟؟

ساعدوني وش رايكم بالموضوع لأن في ميتنق يوم الاحد وصراحة صرت حساسه ابكي كثير واحس هالشي يضعف موقفي بس والله تعبانه وما اتحمل ونفسيتي دمار شامل