التعاطف العنصري.

من زمان كثير ملاحظة هاد الاشي وولا مرة قدرت احكي عنه.

في مشكلة عويصة قاعدة بشوفها من فترة بين الناس إنهم يقللوا من حد لإرضاء حد آخر تحت مسمى "عدم التعنصر والمواساة" متناسيين إنهم بنفس الوقت طبقوا العنصرية ع الطرف الاخر ،دايمًا رح تلاقي تحت اي بوست لبنت بشرتها داكنة مصطلحات زي "بحس اني ارتحتلك ، بحس نفسي افضفضلك، ملامحك نادرة او فعلا جمال الروح احلى 😭💗😭💗" مع انه مقطعها ومحتواها وشخصيتها عاديين زيهم زي اي بنت عالسوشل ميديا وحتى لو غلطت مارح ينتقدوها الا بشكل بسيط بينما البنت الي نفس محتواها بس بشرتها فاتحة رح تلاقي عندها نقد عنيف اذا عملت نفس تصرف البنت الاولى ، هاد التمييز بحد ذاته عنصرية ، عادي احضر وشوف شخص بشرته داكنة تعامل معاه امدحه او انقده بس مافي داعي تتغاضى عن امور او تكذب او تتصنع عشان تبين لطيف لانه هاد الاشي رح يجرحه اكثر لما تعامله انه حد مختلف .

ونفس المبدأ للبنات الطوال والقصار بتلاقي ناس بتذم الطويلة وبنعتوها بمصطلحات سيئة بس عشان يتعاطفوا مع البنت القصيرة مع انه الجهتين لا عيب فيهم وكلهم حلوين ، وكمان قبل فترة شفت ترند تيك توك الناس بتمدح الانف الروماني وبنفس الوقت بقللوا من الناس الي انوفهم مستقيمة وبعتبروه ممل وعديم جاذبية بس عشان ما يحسوا بالنقص.

الي بدي اوصله وقفوا تخبوا عنصريتكم تحت مسميات كاذبة ، تقبلوا جميع الاشكال والالوان بدون تحيّز او تعاطف على حساب تقليل شكل آخر ، فكرة انك تحس انه هاد الشخص محتاج تتعاطف معاه او تعامله بلطافة زايدة بس لانه شكله مختلف هو بحد ذاته عنصرية.