انا سادي مريض

أنا وأنا صغير كان الكل فاكرني الواد المؤدب الهادي اللي ملوش في المشاكل مدرسين وجيران وكله كان بيحبوني عشان محترم و هادي بس الحقيقة أنا كنت مريض بجد كان عندي ميول سادية وبحب أأذي اللي حوالي من غير أي سبب لمجرد المتعة

أختي أصغر مني بسنتين كانت هي الضحية الأساسية كنت بضربها طول الوقت ومستمتع فشخ بالموضوع والأغرب إني كنت بتبسط أكتر لما تضربني هي كمان يعني كل ما تحاربني الأدرينالين عندي يعلى وأتبسط أكتر لدرجة في مرة كسرتلي سناني والدم غرق بقي وأنا كنت قاعد بضحك ومستمتع باللحظة والوجع

في المدرسة كنت عامل فيها الكيوت بس لو حد اتخانق معايا كنت بطلع كل السواد اللي جوايا فيه مرة كسرت مناخير واد أصغر مني ب 3 سنين على الديسك لمجرد إنه ضايقني.. كل ده وأنا لسه في ابتدائي أصلاً

أهلي حاولوا يوقفوني كتير ويقولولي غلط بس مكنش فارق معايا ولا مهتم لغاية ما وصلت ثانوي وكنت بكلم أختي عادي وفي نص الكلام رفعت إيدي حركة عفوية عشان أوضح حاجة لقيتها اتخضت برعب ورجعت لورا وخافت بجد

في اللحظة دي مش عارف إيه اللي حصل في دماغي بس حسيت بذنب وندم عمري ما جربته استوعبت إني مكنتش "رخم" أنا كنت عاملها تروما حقيقية لدرجة إنها لسه بتخاف من أي حد يرفع إيده قدامها لغاية دلوقتي بسبب القرف اللي عملته فيها

من ساعتها بطلت كل الهبل ده وعمري ما مديت إيدي على حد تاني وندمان على كل لحظة وجع سببتها وخصوصاً لأختي اللي كان المفروض أحميها السادية دي حاجة مقرفة ومدمرة بجد لو الشخص معرفش يسيطر على نفسه وهو صغير أنا اتغيرت بجد بس نظرة الرعب اللي في عين أختي لسه فاكرها و عمري ما هنساها