كنت في تالتة ابتدائي تقريبا و كان معانا واحد صاحبي هنسميه فلان كان بيحب واحدة معانا في نفس الفصل هنسميها فلانة و أنا زي أي صاحب جدع قررت أساعده يعترفلها بحبه زي اللي في الأفلام و كتبت جواب بقول فيه لفلانة إن في حد بيحبك و عايز يقابلك و حددت المكان و قولتلها في الآخر إنك متقوليش لحد و كده و انا بغبائي رايح أسلم الجواب بإيدي لواحدة صاحبتها و أقولها خدي ادي الورقة دي لفلانة

و كنت حاسب إنها هيكون عندها فضول عشان تعرف مين اللي بيحبها و هتيجي المكان اللي قلتلها عليه و انا كنت هاخد صاحبي و أوديه هناك من غير ما يعرف حاجة و أفاجأه

بس تاني يوم لقيتها داخلة بأبوها ( اللي هو بالمناسبة يبقي موجه في مادة معينة) و شاورت عليا و طلبوا مني أطلع معاهم برة الفصل و كل اللي انا فاكره انهم سألوني انت اللي كاتب الورقة دي قلتلهم أيوة و بعدها حصل محادثة انا مش فاكر منها حاجة و دخلت الفصل و رجعت البيت بعدها و لا كإن في حاجة حصلت و الغريب بالنسبالي ان محدش من العيال سواء البنات او الولاد اتكلموا عن الموضوع بعدها

كل أما أفتكر الموقف مش بكون عارف ازاي مسقطش في المادة اللي أبوها موجه فيها أو هما ازاي سابوني كده عادي بس الحمد لله عدت علي خير

و انا في ابتدائي كتبت جواب اعتراف بالحب لواحد صاحبي