اولا مفيش حد بيعمل بلوك لما يشوف شكلي ولا حاجة الحمد لله انا شخص طبيعي جداً 

ايه الهدف من البوست؟ دخلت نقاش مع واحد صاحبي ان المجتمع مش بيهتم بمشاكل الراجل خالص سواء نفسية او اجتماعية وإن البنات بس هما اللي بيلاقوا الاهتمام ده 

انا كنت ضد الكلام ده طبعا فقلت اعمل اختبار واشوف بنفسي

اكونت ريديت ده عندي بقاله سنين طويلة و هو بإسم بنت بس واضح اوي يعني انه بتاع ولد خصوصاً اني كاتب ده في البروفايل، بس الناس بتبقى عايزة تصدق اللي هي عايزاه.. المهم كانت مصلحة عشان قدرت اشوف رد فعل الناس قبل وبعد ما يعرفوا اني ولد

غير كدة ده اكونت فيك مش اكونت ريديت الحقيقي بتاعي فممكن اجرب منه عادي من غير ما حد يعرف انا مين

اول حاجة التعليقات على البوست، اللي كانوا فاكرين اني بنت بدأوا يكتبوا تعليقات تشجيعية إيجابية و (انتي بس بتختاري غلط و اكيد جميلة) و كدة

واللي كانوا عارفين اني ولد قعدوا يضحكوا.. او كتبوا حاجات زي (اوف بتوجع دي)

والتعليقات كانت من ولاد و بنات عادي تقريبا نفس النسبة

الرسايل بقا، جالي كمية رسايل رهيبة عايزين يشوفوا شكلي، طبعاً اللي بعتوا رسايل كلهم كانوا فاكرين اني بنت، اول ما قلت انا ولد نسبة كبيرة منهم مردوش تاني. و برضه كانوا ولاد و بنات مش ولاد بس اللي عملوا كدة

الباقيين اللي كملوا كلام اختلفت نبرتهم من تشجيعية الى مجرد فضول، بعد ما كانت (وريني اكيد حلوة و جميلة) بقت (وريني عايز اشوف وهقول رأيي بصراحة)

ده غير اللي مردوش اصلا لما عرفوا اني ولد و كانت نسبة كبيرة اوي منهم، و برضه ولاد على بنات

رضيت فضول البعض منهم بالتحديد بنتين و ولد، و قلت اشوف لو بعدها وافقوا اننا نتعامل عادي

الولد قال (شكلك عادي) بعدها مردش تاني

اول بنت شافت مرديتش تاني

تاني بنت قالت شكلك بني ادم طبيعي انا نفسي بيتقال عليا وحشة و دي آراء و بتاع (ملحوظة هي ما شاء الله زي القمر) بعدها قولتلها لو حابة ممكن نتكلم كل فين وفين انا مش عايز منك حاجة يعني كلام عابر عادي، قالت لا انا مصاحبة و مسحت الشات كله 

الخلاصة:

لو انت بتقدم نفسك للناس على انك شخص ضعيف مثير للشفقة مفيش حد عايزك، رد فعل الناس هيكون انهم فعلا مش عايزينك حتى لو كانوا طيبين معاك

تاني حاجه للاسف، لو انت راجل و عندك مشاكل أيا كان نوعها احب اقولك ان محدش مهتم.. هتلاقي شوية اهتمام في الاول بس عشان الناس تعرف ايه نوع المشكلة اللي عندك، مجرد فضول، بعدها الرد هيكون (طيب يا حبيبي ياللا بالتوفيق)

كان نفسي الاقي نتيجة مختلفة بس للأسف طلعت غلطان و طلع كلام صاحبي صح

من يومين كتبت البوست ده عشان كنت بجرب حاجة و ده اللي لقيته: