من امتى بقت مواسم المخطوبين فرض

كنت بتكلم أنا وصحابي مكالمه جماعية من شوية وإذا بموضوع مواسم المخطوبين ينفتح وبين مؤيد ومعارض كل واحد قال وجهة نظره ووجهة نظري أنه أنا رافضة المبدأ ده أول شيء أنا مش زوجته لسه ف ليه معلش يجبلي طلبات بيت هو أنا بيتي مش فاضي الحمدالله بابا مالي بيته ده اول سبب.

تاني سبب هتحرج اخد منه فلوس ولا حاجه زي دي علشان حتى لو هو خطيبي وبنحب بعض إلا أنه برضو مش زوجي انتوا فاهمين مفيش درجة من الارتياح ، فاهمه أنه ممكن الخطيب بقولك لا بقت مسؤوله مني واعرف ناس بعدي كمان مصروف شهري بس بجد بحس أنه لا يجماعه مش الدرجه هو لو مصر ممكن يجيب هديه بسيطه وجابها أو لا مش هقول عليه بخيل لأن من اول أنا أو اهلي قالوا متجبش حاجه .

تالت حاجه من المنطق في ظل الظروف اللي احنا فيها دي من باب الذوق أن الأهل تقول للشاب متجبش حاجه وكفاية باقي ضغوطات.

رابع حاجه والي كانت هتشلني من رأي المؤيدين يقولوا اومال انتي عايزاه ياخدني ببلاش!! مش لازم اعرف انه كريم ولا لا ؟ هنا بصراحه من قلة الوعي برأت اللي هو بجد !!!؟؟ أنتم بتختبروا اللي مخطوبين بيه بالطريقه الهبله دي😂 مفيش اسهل من التمثيل ولما تكوني في بيته جاب أو مجابش محدش هيقوله انت بتعمل ايه ومحدش هيلومه اصلًا علشان أوضاع دلوقتي ف يافرحتي جابلك ومثل انه كريم في الخطوبه وقفل المحبس وانتي على ذمته ده لو في حال واحد ممثل في احسن الأحوال هيضغط على نفسه ويشيل فوق طاقته علشان خاطر يفرحك !! مظنش تبقى فرحه لو جايه بضغط فيه مليون طريقة تانيه تعرفي بيها راجل اللي معاكي ده كريم ولا لا ومش بس كريم في فلوس كريم في مشاعر زي مثلًا لما يشوف عينك راحت على حاجه ومعلقتيش ولا سمعك بتقولي عايزه تجيبي حاجه وجبهالك هو ولا منيمكيش زعلانه ولا ولا ولا راجل اللي معدنه طيب بيبان ومش بقول متختبريش دي فتره تعارف مش فترة نحنحه فاختبري زي ماهو بيختبر بس بالعقل والمنطق الله يكرمك مش بعادات وتقاليد لا بتودي ولا بتجيب.

فبجد اظن العادات والتقاليد والأصول ومش الأصول دي محتاجين نعيد نظر فيها لانها منها اللي بيضغط ويزود الأعباء على الأهالي والشباب .