هقول كلام يمكن يزعل فئة من الناس بس هقوله لوجه الله

للأسف حصل معايا موقف امبارح في الكلية ومأثر فيا لغاية دلوقتي

هو مش موقف بالمعنى الحرفي لكن بجد هو عبارة عن نظرة بالغلط

انا مش بحاول أتحكم في حد ولا متشدد ولا برمي الناس بالزندقة ولا ولا ولا ولا

انا واحد تعبان من اللي انا شوفته ومش قادر أنسى المشهد كل شوية ييجي قدامي وقلبي يوجعني وهتكلم عن الموضوع من باب الحلال والحرام

المهم بكل اختصار انا قاعد في الكلية عادي مستني امتحان الميد فخدت بالي أن حد داخل المدرج فببص عادي خالص زي أي حد لقيت زميلة من الزميلات اللي انا بحترمهم جدًا داخلة وكان في مشكلة في لبسها كان ضيق نوعًا ما وفي تفاصيل تانية بس انا مش هقولها

المنظر مش راضي يروح من دماغي ومتضايق من نفسي إني كل شوية أفتكر وخايف عليها عشان انا على الأقل صرفت نظري على طول في غيري ممكن يبحلق ويسرح في خياله دا والله أعلم ايه اللي ممكن يحصل في الشارع

بغض النظر عن الخناقة المنتشرة بين شوية العيال اللي مافيش في دماغهم ربع جنيه حياء ولا خوف من ربنا اللي تيجي تقول لك الراجل يغض بصره والست تلبس براحتها ولا الذكر اللي يقول مادام هي متبرجة يبقا أبص براحتي

أسأل الله باسمه الأعظم أن يهدينا

ياريت يا جماعة نخاف شوية

نخاف من ربنا ونخاف على نفسنا وعلى بعض

هما كلهم كام سنة ونموت وفي الأيام دي الواحد ماعندوش أمل انه يوصل لسن المعاش فياريت نخاف من ربنا شوية ونحاول نزق الكام سنة دول لحد ما نموت