लुसलुशीत पुरणपोळी

मऊ आणि लुसलुशीत पुरणपोळी ही महाराष्ट्रीयन सण-उत्सवांची (विशेषतः होळी आणि गुढीपाडवा) शान आहे. खालील रेसिपी वापरून तुम्ही घरीच हॉटेलसारखी टम्म फुगलेली पुरणपोळी बनवू शकता.

साहित्य पुरणासाठी

हरभरा डाळ: १ कप (१ तास आधी भिजवलेली) ,गूळ: १ कप (चिरलेला) - किंवा निम्मा गूळ, निम्मी साखर,पाणी: ३ कप (डाळ शिजवण्यासाठी),वेलची पूड: १/२ छोटा चमचा,जायफळ पूड: १/४ छोटा चमचा,हळद: १/४ छोटा चमचा ,तेल: १ मोठा चमचा ,कणकेसाठी ,गव्हाचे पीठ: १ कप, मैदा: १ कप तेल: २-३ मोठे चमचे ,मीठ: चवीनुसार.

कृती

१. पुरण तयार करणे:

कुकरमध्ये भिजवलेली डाळ, पाणी, थोडे तेल आणि हळद घालून ४-५ शिट्ट्या करून डाळ चांगली मऊ शिजवून घ्या. डाळीतील जास्तीचे पाणी (कटाचे पाणी) गाळून घ्या (या पाण्याचा वापर तुम्ही कटाची आमटी बनवण्यासाठी करू शकता). एका कढईत शिजलेली डाळ आणि गूळ एकत्र करा. मध्यम आचेवर मिश्रण घट्ट होईपर्यंत सतत हलवत राहा. मिश्रण घट्ट झाले की त्यात वेलची आणि जायफळ पूड घालून मिक्स करा. हे गरम असतानाच पुरण यंत्रातून किंवा गाळणीवर पेल्याने दाबून बारीक करून घ्या जेणेकरून पुरण एकदम मऊ होईल.

२. कणिक मळणे:

गव्हाचे पीठ, मैदा, मीठ आणि थोडे तेल एकत्र करून थोडे थोडे पाणी घालत सैलसर आणि मऊ कणिक मळून घ्या. कणकेला थोडे तेल लावून किमान १ तास झाकून ठेवा. पीठ जितके जास्त वेळ मुरेल, तितकी पोळी मऊ होते.

३. पोळी लाटणे व भाजणे:

कणकेचा एक छोटा गोळा घेऊन त्याची वाटी (पारी) तयार करा. त्यात कणकेच्या गोळ्यापेक्षा थोडा मोठा पुरणाचा गोळा भरा.तोंड बंद करून जास्तीचे पीठ काढून टाका आणि थोडी पिठी लावून हलक्या हाताने पोळी लाटा. गरम तव्यावर पोळी टाकून मध्यम आचेवर दोन्ही बाजूंनी खरपूस भाजा. भाजताना वरून साजूक तूप किंवा तेल लावा.

पुरणपोळी