ما هي الوطنية يا صفية؟ قصة

بوست متوسط الطول.

الملخص: الوطنية لا تقاس بالماديات. ما هي الوطنية؟ هاي ببوست ثاني.

قصة صارت معي من فترة، وهي والله حقيقية كما أقولها:

مرة قعدت مع طبيب بعرفه (مش صغير بالعمر يعني) من إحدى محافظات الجنوب، كان دارس طب منحة في إحدى الدول الأوروبية، وعاش فيها فترة.. فكنا بنحكي عن الناس والأوطان وكذا.. ومن سيرة لسيرة، قلي بتعرف يا فلان؟ أنا بسأل حالي كثير مرات لو صارت حرب بين الأردن والدولة الي درست فيها لا سمح الله مع مين بدي أوقف؟ يعني الأردن شو أعطتني؟ والدولة هاي شو أعطتني بالمقابل؟

وحكى حكي ثاني ما راح أحكيه هون، عشان ما ينحذفش أو أنا ما أنحذف. ولا أخفيك إني سمعته وزعلت، مش عالشب ولا عالأردن تحديداً. عكل حالتنا عموماً.

أكيد كره الإنسان بلده لي عايش فيها خطأ، وملوش مبرر بالنسبة إلي نهائياً.. لكن إذا خطأ لي بكره صاع، خطأ الي خلى البلد عهاي الحالة وخلى ولادها يكرهوها ١٠٠ صاع. و حب البلد والوطنية الحقيقية لا يمكن برضو ينجبر فيها الإنسان بدعوى شو قدمتلكم البلد عموماً.. أول إشي إحنا الناس البلد بدرجة أولى، البلد ناس مش تراب وشوارع هيك بتسبح بالفضاء لحالها.. إحنا مثل ما بنوخذ بنعطي، وبنعطي من عمرنا للبلد وأهلها يعني لحالنا بالآخر.. وما في حدا بيتعاير بشيء هو بقدمه. ولو جدلاً كان صحيح: إذا كان معيار الحب ورد الجميل برتبط بالتقديم المادي، فإحنا بنبرر كل عمالة وخيانة بالعالم، لأن العميل هو شخص قدمتله دولة ثانية لي ما قدمله ياه بلده فخانه.

الوطنية الحقيقية أكبر بكثير من هيك.