عاوز حل اتخنقت
أنا تعبت بجد ومش فاهم أنا اللي فيا مشكلة ولا الناس اللي حواليا.
بقيت بقفل بسرعة من الناس وبخاف منهم، خصوصًا اللي في المدرسة. بقيت بقرف من الكلام والجو كله.
موضوع الحشيش بقى منتشر بطريقة غريبة، كل ما أكلم حد يقول لي "جربت؟ شربت؟" ولو قولتله آه عشان أمشي الدنيا يقوم مطلع حتة حشيش من جيبه قدامي عادي!
واحد تاني كان كويس وبيتمرن جيم، ألاقيه متصور مع واحد صاحبه ومنزل ستوري عيد ميلاد، وفي نص الصور فيديو وهم مع رقاصة في مكان كله كده… حرفيًا حاجة غريبة.
طريقة كلام العيال بقت كلها شتيمة: "ابن الحرام"، "يا خاول"، وخناقات على الفاضي، وكأن لازم تبقى بتتخانق وبتشتم عشان تبقى راجل!
وفي تقسيم وضرب ولازم يكون قلبك جامد، ولو مش كده تبقى ضعيف.
وبصراحة أنا عايز أنغمس معاهم عشان ما بقاش غريب أو لوحدي، بس للأسف بدأت أحس إني بقيت سلبي، وبدأت أحس باكتئاب. من جوايا دايمًا حاسس إني متهدد، وحاسس إني في خطر على طول، ومش مرتاح خالص.
وكمان الغريب إن ناس كتير منهم أصلاً ما بيشتغلوش على نفسهم خالص، وممكن تقابل أهاليهم تلاقيهم ناس محترمة جدًا! وفي منهم جايين من أماكن مش أحسن حاجة، وينقلوا أماكن أنضف بس نفس التصرفات زي ما هي.
أنا أصلاً بحب المواجهة بالكلام الأول، مش بحب العنف، بس بجد المدرسة كلها بقت كده: لازم تضرب وتتخانق، ولازم تلاقي حد يسخنك على حد عشان تقوم داخل خناقة وتعمل جولة وخلاص!
وخليني أقول كمان إن المدرسة عندي مشتركة، فالموضوع زاد سوء… بقى في استغلال، ومبقاش في احترام خالص نهائي.
وبقى عادي جدًا حد يطلع حشيش قدامك كده في وشك من غير أي كسوف.
بجد أنا مش فاهم… هو أنا اللي غلط؟ ولا في إيه؟
ليه كله بقى لازم يبقى في دايرة شمال؟ وليه الناس بقت مستفزة بالشكل ده وعايزة تجرّك للحاجات دي؟
حد فاهم اللي بيحصل ده ولا أنا بس اللي حاسس كده؟
Posted Apr 3, 2026, 4:42 PM UTC