سالفة غريبة بس ابي اطلعها من تفكيري وابي رايكم🙃

بالمتوسط، انحطينا انا ووحدة بنفس الفصل (خل نسميها ر) ولا انتبهت لها عشان اول اسبوع كنت مرة زعلانه صحباتي كلهم بفصل وانا بفصل، انتبهت لها وشفتها اول مرة لما رحنا لنفس المعلمه نبي ننقل فصلنا🙃 طلعت نفس حالتي ههههههه

تعرفنا بعدبن بالتدريج عشان بنفس الفصل وكمان كان عندنا صديقة مشتركة (نسميها ج) ج دايم قاعدة مع ر فلازم اذا ابي اقعد معاها نقعد مع بعض

يوم خميس عشوائي كان فراغ مو طبيعي كل المعلمات غياب وجلسنا مع بعض واخذتنا السوالف وكانت تعرف مسلسل مو مشهور كنت اموت عليه وانصدمت في احد يعرفه وجلسنا نسولف عنه ومرة اعجبت فيها بعد ذاك اليوم (المسلسل كان ماخذ عقلي)

صارت بعيوني كل شي.. يعني ما شاء الله ذكية وهادية وتتابع الي اتابعه وشخصيتها كانت مرة حلوة وشعرها كان كيرلي طويل تسويه محدد ويطلع مرة مرة حلو عليها. وجهها كان بيبي فيس وتصير حمرا مرة اذا انحرجت او استحت كانت مرةةة كيوت وكنت اموووت واصير صديقتها (صح كنا نتكلم بس علاقتنا ماش حدها الفصل) كنت مرة معجبة فيها وابي اصبر زيها ونصير صديقات مقربات وتصير تسولف معاي بنفسها بدون ما احس اني ثقيلة او مزعجة. اتذكر بعد ذيك السالفه رجعت البيت وانا مرة متحمسة وفرحانه لقيت احد نفس جوي بس بعدها جيت اسولف معاها بطاقة يوم الخميس واممم. مدري وش صار بس ما كانت زي اول، اكلمها هي تستمع بس مرة وجهها طفشان وتلعب بشعرها وهي تكلمني حسيت اني مزعجة معد رحت بنفسي فتحت سالفه معاها

يعني كنا نتكلم ونقعد مع نفس المجموعه بالفصل بس كنت دايم احس اني بعيدك عنها مقارنه بال الجنوني الي كان عندي friend crush

يعني. كان عندي امل وكنت دايم اراقبها بالسوشل ميديا (عرفت مع مين تطقم هيهي) وكانت تمشي دايما مع بنت اسمها (ب)، كنت احسد ب بشكل مو طبيعي! اقعد اراقبهم مع بعض طول الوقت.. كيف انها تجيها بنفسها وتفتح سوالف وتضحك معاها. صدق صدق كنت غيرانه من ب بشكل مو طبيعي احيانا كنت اكرهها (اسفه مرة ب) مع اني ما اعرفها

مرة من المرات جات تمشي معاي بالساحة (ر الي جات) واهههه كنت فرحانه مرة ههههه دخلنا بسوالف وكذا وقالت لي عن تاريخ ميلادها (تخيلو بيننا يوم!! انا اكبر بيوم 😋 ) وانا حفظته حفظ حفرته بمخي عشان السنه الجاية ابارك لها (حطيته باسوورد اخ😭 )

جت السنه الجاية. انحطينا بفصول غير عشان مدرسة جديدة وكذا، بس دايم تصير مو شي جديد ان كل سنه الفصول تتغير. الي كانو معي السنه الي قبلها كملنا صديقات ونسلم ونبتسم لبعض طبعا مو كلهم اكيد. اما ر مرة تغيرت علي! بداية السنه كنت مرة زعلانه يخي ابي اسولف معاها واكمل مشروع التعارف الي من العام هههههههههههه

يعني لسا كانت بعيوني نفس البنت اللطيفة صعبة المراس وكنت احسب علاقتنا ما بتتغير لان ليش تتغير مافي سبب، الصدق صارت تنجنبني واذا تقابلنا بالممرات تطالع بالارض ولا تسلم ولا تبتسم زي ما نسوي لو قابلنا احد بالممر. طبعا كنت اطقطق مع صديقاتي الي يعرفونها واقول صارت تستحي مني (هي خجولة بس ما كانت تستحي مني ابد) بس يعني اذا انا بادرت هي بترد ما تتجاهل فا ما حسيت بسوء مرةةة يعني

كان لما تصير مناسبه ويعطونا وقت بالساحة (ينزلوا كل المدرسة تحت ويخلونا مع بعض وكل وحدة تروح لصحباتها) اروح لها واسلم عليها ونسولف وكانت تصير مواقف ظريفة زي تقول حرانه وانا اهويها بعدين تقول هاتي! وتهويني ونصير نضحك مع بعض

طبها فذيك السنه صارت لي مشاكل كثيييير من كل الأنواع الي تتخيلونها حتى من كثرها ما بمدي اكتبها وصرت احس ان لطافتي وعفويتي الي مع الكل كذا لازم تتعدل واصبر اعاملهم زي ما يعاملوني، فا صرت ما ابادر ولا اروح لها انا واذا تقابلنا صرت اسوي نفسها ما اسلم لاني بديت احس اني ابذل على الفاضي مهي ما تهتم ليش متعبة نفسي

ما توقعت منها تجي تعدل اي شي ولا تعتذر مني بس يعني عشرة سنه وعليها باعتها بدون سبب وصارت تعاملني بغرابة ودي والله اسال واعرف اذا زعلتها بشي او ضايقتها بس...

وش تحسون ممكن غيرها علي؟ طبعا على الي قلته ذا كله ممكن تحسون اني كنت نشبة وذا صايقها بس ابدااا ما كنت انشب لها بعد ما حسبت اني مو مرغوب فيني.

الي طراني السالفه ان الاسبوع الي راح تقابلنا واحنا طالعين من الدوام ناظرت فيني وناظرت فيها غطيت وجهي وطلعت ما ابتسمنا لبعض ولا شي وتذكرت ذي السالفه