الزواج من جنسيه اخرى

السلام عليكم ورحمة الله وبركاته، يوم جميل لكم جميعًا،

بحاول قد ما اقدر اختصر السالفة لانها مسببة لي ازمة ومتعبتني نفسيًا صراحةً، وباقي للحين ادور حل وسط للموضوع وحاب اسمع رأيكم..

انا تعرفت على وحده من الجنسية المصرية، وبعد فترة اكتشفنا اننا متوافقين في اغلب الاشياء باختلافات بسيطة تكاد تذكر (لقيت فتاة احلامي وهي لقت فتى احلامها)... كل شيء تمام والتزامها بدينها كويس وعائلتها محترمة.. لكن لما جيت افتح الموضوع مع امي وابوي واجهت منهم رفض قوي مو لاسباب منطقية... كلها اسباب عنصرية بحتة وخوف من كلام الناس، مهما حاولت لو بس عالاقل يتعرفون على اهلها وعالبنت اكثر، لكن مره مو معطيني مجال مهما صار..

طبعًا ابوي (الله يهديه ويصلحه) يا يمشي كلمته علينا بالغصب او حنا عاقين ويوصل تهديده انه يتبرأ وبعض الاوقات (💀).... افهموها عاد. بحثت في الانترنت عن الموضوع ذا وكلها تقول حاول تقنعه وتزوج، واذا ماقدرت يمدي تتزوج لان مافيه شيء غلط في اللي اسويه، بروح قريب لدار الافتاء واسمع منهم عن الموضوع كامل وببقى اكلم كم شخص متدينين ومتعلمين في الدين اخذ العلم كامل... وطبعًا امي تخاف من ابوي ومهما صار تمشي على كلامه

انا صراحة ودي اتقدم لها من اهلها عشان نكون ماشين على الدين صح وماودي ااخر الخطوة خوفًا من تطور الموضوع خارج اطار الزواج، لكن داخلي شيء يمنعني وهو خوف ان ابوي يتبرأ مني، طبعا باقي اهلي من اخواني واخواتي معي لكن باقي ذا الخوف المزروع فيني من يوم وانا صغير يمنعني اقدم عالخطوة هذي وصراحة تعبت.

طبعا امي وابوي قالو شف لك احد من هنا فقلت خل اشوف (طبعا مشيتها لهم عشان اشوف ايش بيقولون)... في عائلة نعرفهم وقريبين منهم جدا وهم عائلة متدينه وجدا كويسين ولما كلمت امي وجهها قلب كان مو عاجبها وابوي مو موافق، شفت وحده معي في الدوام ونفس الموضوع (يبوني اتزوج على مزاجهم)... وكمان اول مره فتحت الموضوع لابوي قال لو تتزوج من اختيارنا وتطلع قرض مبلغ وقدرة (مبلغ مهول) ويفشل زواجك احسن من انك تتزوج المصرية؟؟ وقال لي اتزوج امريكية احسن؟ (نصرانية افضل من مسلمة..؟) فالموضوع كله عنصرية وخوف من كلام الناس وش بيقولون عنا، طيب هو انا اللي بتزوج وانا بتحمل اي مشكلة تصير بتزوج بنت انا اخترتها مو المجتمع اختارها لي.

فصراحة ودي اسمع رأيكم عن الموضوع هذا لانه تعبني وممكن بعد شهر اقول لابوي ان خلاص بتقدم لها واللي يصير يصير. وطبعا طول السنين ماكان موجود في حياتي واللي وفره لي هو المسكن والاكل وملابس الى مرحلة معينة في عمري(الحمدلله) لكن باقي الاشياء كلها انا جايبها لنفسي بدون مساعدته واذا طلب مني اي شيء اعطيه بدون ما اسال.

طبعا تصرفاته وغضبه لحالهم يبغالها بوستات ثانية :) ان شاء الله ما اكون نسيت شيء وبس احتاج اسمع رأيكم.