الليبرتارية

ببساطة كده:

فكرة إن الدولة تبقى أقل ما يمكن والناس تبقى حرة في حياتها لأقصى درجة طالما مش بتأذي غيرها

يعني لا تدخل كبير من الحكومة لا قوانين كتير تتحكم في تفاصيل حياتك وسوق حر يمشي لوحده

بس السؤال اللي دماغي واقف عنده:

هل الكلام ده ينفع عندنا فعلًا؟

من ناحية ممكن يدي حرية أكبر بكتير

يقلل الفساد ويخلي أي حد عنده فكرة أو مشروع ينجح بسهولة.

بس من ناحية تانية

مين هيشيل مسؤولية العلاج؟

من ناحية مجانية التعليم فانا كنت بشوفها غلطة كبيرة لان اغلب الدول الي حاليا تصنيفها سئ في التعليم كان بسبب غياب الرؤية والإمكانيات واننا قبلنا نخلي اي حد سواء مستعد او مش مستعد للتعليم انه يخضع للتعليم الإجباري المجاني مما يكلف الدولة من ميزانيتها وفي الآخر بيطلعلنا نماذج مش كفء لان المنظومة فاشلة من الاول وفي الاخر الحكومة مبتديش تعيينات ( اكيد النقطة ديه ناس كتير هتختلف معايا فيها 🤣)

وماذا عن الناس اللي معندهاش فرصة أصلاً تبدأ؟

اعتقد ان مكافحة التضخم ووجود نظام بيشجع على الاستثمار والتكافل المجتمعي هم الحل

وهل المجتمع أصلًا متقبل فكرة إن كل واحد يعيش زي ما هو عايز؟

اكبر معضلة لان هنا بننصدم ان مجتمعاتنا اغلبها مجتمعات محافظة وعاطفية بل ان كلمة ليبرتارية غريبة عليها وكلمة ليبرالية شتيمة

وان الدين بدل ما يكون موجود كمعتقد قابل للاختيار والنقد اصبح اداة في يد الحكومات لتلميع صورتها

هل مع التقدم التكنولوجي وسهولة الوصول للمعلومة أفكار زي ديه ممكن نتقبلها ولا هنفضل في الدوامة ديه ؟