بحس أن مشاعري جافة

حجات بلاحظها بنفسي كتير لدرجة بدأت تخنق، وهو أني مش بعرف اتعاطف او أدعم حد باسلوب كويس بفترة زعله.

تعاملي مع المواساة سئ جداً، بل بيزود المشكلة. لأني بكل مرة بلاقي حد زعلان وبيمر بفترة صعبة او بيعيط بلقى نفسي بحالة من التوتر والعصبية ومش بعرف اتفاعل وممكن احاول اتجاهل حالة الشخص ده رغم أني بكون في حيرة شديدة وارتباك بسببه

أول حاجة بعملها اني ممكن اقف واستنى الشخص ده يطلب مني حاجة، او لو بدأ يحكيلي المشكلة انا تلقائيا ببدأ ادور عن حلول منطقية او اسلوب ما لادارة الزعل ده بدون ما احاول احتوى الشخص ده

بل لما بلقى ان مفيش حلول تخليه يبطل العياط، ببدأ التوتر أكتر وفجأة بيبقى مزاجي عصبي وممكن اتعصب على الشخص ده او أصرخ فيه انه يبطل بدون تفهم انه ده مش بأيده

ولما مش بينجح ده طبعا بنسحب بسرعة زي ما بكون خايفة من مواجهته، وبيجيني احساس سئ وهو نوع من الغضب على الشخص ده، وده مش صح ولا انساني اني اغضب على شخص بسبب أنه حزين!

لكني مش بعرف اسيطر على سلوكي وبل مش بلقى طريقة تانية لتعامل مع الموضوع غير دي، وحتى مع نفسي لما أكون انا اللي زعلانة لدرجة افرغ طاقتي بالعياط القى نفسي فجأة بأسكت وملامحي بتجمد وترجع لطبيعتها وحتى صوتي كأنه مفيش حاجة وبعدين اول ما يرجع مخي يسترجع سبب زعلي بنغمس بالعياط تاني وببقى بكره نفسي بشدة بسبب ده بل ببدأ استرجع كل شئ سئ فيا كأني بتعصب على نفسي واللي ممكن يوصل لدرجة اني احاول اوجع نفسي بطرق معينة زي شد الشعر او ضرب رأسي بالحيطة او سطح صلب

بحس اني دايما بحاول اهرب من الحزن سوأ فيا انا او في الناس التانية لكنه بينتهي اني انغمس فيه أكتر، بل بشوف السعادة ولو بسيطة هي فترة راحة قصيرة وارجع استكمل البؤس ده تاني

لكن الموضوع بدأ يأثر حتى على علاقتي بأقرب الناس ليا، وبحس اني بشجعها على الهرب من زعلها زي بدل ما تفرغه وبحس بقرف من نفسي او بشك بمشاعري الحقيقية ناحيتها لما بلقى اني مش بعرف احتويها

ولا أي حد تاني، حتى اهلي في حالات مرضهم او زعلهم بيبقى تعاملي على قد المطلوب مني، بل بلقى صعوبة اني اقعد جنبهم او اعرف اواسيهم بأي شئ وبكتفي اني ابص عليهم بجمود بأنتظار انه ينطلب مني حاجة، واذا طلبوا مني امشي بمشي ببساطة والقاهم ببصرخوا عليا أكتر بعدها مما بيخليني بحالة ارنباك وعصبية اكتر

بحس اني شخص جاف بالتعامل ومش بعرف ادي حب ودعم للي حوليا بطريقة صح، بل احيانا بحاول اتصنع ردود او اقلد اسلوب معين عشان اوصلهم اني بعرف اتعاطف واحس بيهم لكن الموضوع بيكون مرهق جدا

ومش عارفة الاقي حل لده بدون ما احس اني بتصنع كل ده