Is My Best Friend’s Behavior Normal or Am I Overthinking?

Hey guys, yeh thodi long story hai.

Yeh start hua 2023 me jab main aur meri friend 12th pass hue. Hum dono 6th standard se best friends the—bilkul pakki wali dosti. Beech me kisi wajah se mujhe 10th me school transfer karna pada, lekin phir bhi hum contact me the aur time milta toh mil bhi lete the.

12th ke baad hum dono ne ek coaching me padhana start kiya. Phir ussi saal suddenly usne mujhe bataya ki uska ek boyfriend hai. Mujhe thoda shock laga kyunki woh kabhi relationships me interested nahi lagti thi, aur uski family bhi thodi conservative hai. Mujhe thoda hurt bhi feel hua ki main uski itni achhi best friend hoon, phir bhi usne mujhe yeh baat pehle nahi batayi. Woh mujhe sorry bolne lagi, aur maine usse maaf kar diya kyunki main uske liye genuinely happy thi.

Kuch dino baad usne decide kiya ki woh pehli baar apne bf ke saath date par jayegi, aur usne mujhe bhi saath chalne ko kaha kyunki uski family ko pata nahi tha. Isliye woh mujhe ek tarah se “security” ke liye le ja rahi thi. Jab main uske bf se mili, mujhe woh thoda egoistic laga. Woh sarcasm ke naam par continuously mera mazaak uda raha tha, aur meri friend ko yeh sab normal lag raha tha. Phir bhi main chup rahi, sirf uske liye.

Wahin mujhe pata chala ki woh log pehle bhi movie date par ja chuke the, toh usne mujhse jhoot bola tha ki yeh uski first date hai. Ghar aakar maine usse confront kiya, lekin usne baat ko casually ignore kar diya.

Next day jab main coaching gayi, toh woh ladka phir aaya aur meri friend ko tease kar raha tha. Kisi baat par maine bhi mazaak me ek baar usse tease kar diya, toh woh gussa ho gayi aur mujh par zor se chillayi, “Chali ja yahan se tu.” Yeh sunke maine decide kiya ki main usse baat nahi karungi. Lekin baad me woh normally act karne lagi aur sorry bhi boli, toh maine usse maaf kar diya. Phir bhi maine decide kiya ki main dono se thoda distance maintain karungi.

Kuch months baad mera admission ek achhe college me ho gaya, aur meri friend ne drop lene ka decide kiya. Maine usse call karke apne admission ke baare me bataya, lekin woh thodi ro rahi thi. Tab mujhe pata chala ki us ladke ne usse dump kar diya hai, kyunki usne kisi friend ke saath bet lagayi thi usse date karne ki. Woh ro rahi thi aur main usse console kar rahi thi. Maine apni college life bhi uske saamne flaunt nahi ki—na stories dali, na status—taaki usse aisa na lage ki main usse bhool kar enjoy kar rahi hoon.

Gradually main apni studies me busy ho gayi, aur woh apni life me. Calls par baat ho jaati thi, lekin milna nahi ho pata tha.

Ek din woh suddenly apne hometown chali gayi. Maine usse bahut baar contact karne ki koshish ki, lekin usne calls pick nahi ki. Wapas aane par usne bola ki wahan bahut kaam tha aur network issue tha, isliye reply nahi kar paayi.

Phir ek aur shocking baat pata chali—usne mujhe bataya ki woh 5 months se job kar rahi thi, lekin usne mujhe yeh baat kabhi nahi batayi, jabki hum regular baat karte the. Jab maine usse confront kiya, toh usne kaha ki usne yeh baat apni elder sister ko bhi nahi batayi, toh main kaun hoti hoon. Aur agar use batana hoga, toh woh sabse pehle apne parents ko batayegi, na ki mujhe. Yeh sunke main bilkul toot gayi.

Uske baad maine usse calls par baat karna lagbhag band kar diya—sirf limited baat karti thi ya busy hone ka bahana bana deti thi.

Ek din uski elder sister ne usse rote hue dekha aur mujhe call karke kaha ki main thoda usse time diya karun, kyunki woh bahut akeli hai. Uski family mere saath hamesha bahut achha behave karti hai—uske parents mujhe apni beti jaisa hi treat karte hain aj bhi Isliye maine phir se usse baat karni start ki.

Phir ek din usne bataya ki woh phir se kisi ladke ko date kar rahi hai, jo uski sister ke hometown se belong karta hai. Aur is baar bhi woh 5 months se relationship me thi, lekin usne mujhe nahi bataya. Jab maine poocha, toh woh bahane banane lagi ki main usse contact me nahi thi, isliye woh mujhe bat nahi paayi—jo clearly galat tha.

Is baar maine decide kiya ki main uske relationship matters me interfere nahi karungi. Sab normal chal raha tha—woh apni life me khush thi aur main apni life me.

Lekin kuch din pehle usne bola ki usse darr lag raha hai ki yeh ladka bhi pehle wale jaisa na nikle. Maine usse advice di ki woh apna past honestly share kare aur baith kar proper baat kare. Tab usne kaha, “Main sabki sunti hoon, par karti apni hoon,” matlab woh apne aur apne bf ke beech kisi teesre ko nahi aane degi.

Yeh baat mujhe kaafi hurt kar gayi.

Us din ke baad na maine usse call kiya, na usne mujhe. Mujhe pata hai ki woh call karegi… par ab mujhe samajh nahi aa raha ki mujhe kya karna chahiye.

Ek best friend hone ke bawajood usne mujhse itni baatein chhupayi. Me usse friendship bhi nhi break par rahi hu kyuki woh lambe time se meri friend hai phele uska behaviour itna problematic nhi tha jitna ab hai aur upar hum dono parents bahut ek dusre ko bahut maante hai ek hi best friend woh bhi aisi nikli college me bhi maine friends nhi banaye jyada taaki usse bura na Lage.... Khair thanks for reading this