سيدة كبيرة في العمر في حي نور جعفر (قرب أريانة الصغرى) محتاجة مساعدة – هل توجد جمعيات أو ناس تنجم تعاونها

السلام عليكم الناس الكل،

حبيت نكتب البوست هذا على خاطر فما سيدة كبيرة في العمر نشوفها تقريبًا كل يوم في النور جعفر قرب أريانة الصغرى، خاصة في العشية. تقعد بحذا poubelle وتلمّ في القوارير البلاستيك والحوايج باش تبيعهم وتعيش منهم. مرات نشوفها هازا برشة شكاير كبار وحدها، والمنظر يوجع القلب بصراحة.

تكلمت معاها أكثر من مرة، وقالتلي اللي ركايبها يوجعوها برشة من كثرة الهزان والمشي. مرات حتى تطلب taxi ولا ناس بالكرهبة يوصلوها ولا يعاونوها توصل الشكاير، وحتى وهي تعرض عليهم تخلّصهم يرفضوا ويخليوها وحدها.

أنا ديما نحاول نعاونها باللي نقدر عليه، أما أنا زادة étudiant وإمكانياتي محدودة شوية.

إذا فما جمعيات، ناس تعمل خير، أو حتى حد يعرف شكون ينجم يهبط يشوف حالتها ويحاول يعاونها (مساعدة مادية، علاج، نقل، أكل، ولا حتى متابعة)، يا ريت يدلّني أو يتواصل.

والله الوضعية متاعها توجع، خاصة كي تشوفها كبيرة في العمر وتجرّ في شكاير كبار وحدها كل يوم.

ربي يجازيكم ❤️