الحياة كواحد عنده OCD (وسواس قهري)

الوسواس القهري ده اقرب مرض نفسي للشيزوفرينيا في رأيي، هو اكبر مصيبة فحياتي واكتر حاجة مؤذية. الموضوع كأن حد عايش في دماغك مفيش حاجة عاجباه، انت متوضتش كويس، انت مقفلتش الغاز، انت مقفلتش الباب و الامثلة مش بتخلص. عايز اقول اني كان بييجي عليا ايام ممكن اقوم من النوم ٨ مرات اتأكد الغاز اتقفل ولا لا (محدش جه ناحيته طول اليوم اصلا بس الوسواس عايز كدا).

الموضوع مقتصرش على افعال قهرية بس، بل افكار برضو مؤذية ومدمرة للعلاقات خاصة العاطفية. كل شوية حد فدماغك بيقولك انت مش محبوب انت مش حلو انت مش كويس انت تقيل وانت كذا كذا ف تروح تحاول تهدي الافكار دي بإنك تسأل الطرف التاني هو انا كدا فعلا لحد ما يزهق منك عشان مفيش اجابة بتريحك لازم كل شوية يأكد عليك انك كويس. طبعا ده مثلا بسييييط مقارنة بالعلاقات الكتيرة اللي باظت بسبب افكاري وافعالي القهرية (مفيش مبرر وانا غلطان بس مش بمزاجي عشان ده مرض مش بعيش دور الضحية).

المهم قعدت سنين باخد علاج ومهدئات بس الموضوع مش بينتهي بكدا ولا بيخف اوي، لازم يبقى في علاج سلوكي وتقاوم الافكار دي وتتعلم تتعايش معاها كأنها مجرد ضوضاء في دماغك وانها ملهاش قيمة ولا ليها لازمة وانت صاحب القرار ومش هتمشي وراها. محدش متخيل قد ايه الوسواس ده وحش فشخ والموضوع مش مقتصر على حجات تافهة زي عادات متكررة.

لا ده حرفيا في شيطان عايش في دماغك عمره ما هيسيبك فحالك