خويي "الوحيد" صار يلاحقني في كل شي
يا جماعة، أنا في ورطة مع خويي اللي أعرفه من 15 سنة، والموضوع وصل لمرحلة غريبة ومخيفة. خويي هذا إنسان غير اجتماعي تماماً، ما يكلم أحد في الدنيا غيري، ولا عنده إخوان ولا أصحاب، حرفياً أنا كل حياته.
المشكلة إننا نداوم في نفس المكان، هو مهندس وأنا فني. إذا صار عنده إجازة يومين، يغصبني أغيب معه ويوصل فيه الموضوع إنه يدفع لي قيمة اليومية حقت الدوام بس عشان ما يداوم وأنا مو فيه! أحاول أرفض لكنه يحول لي الفلوس غصب ويصر إني أطلع معه.
كل شي في حياته يعتمد علي، حتى ملابسه ما يشتريها إلا إذا كنت معه. والمصيبة الأكبر، إذا قلت له إني ناوي أتزوج أو بقلل طلعاتي عشان ألتفت لحياتي، يزعل ويقعد يدعي علي إني ما أتزوج عشان ما أتركه! مع إنه إنسان مقتدر مادياً وما يقصر معي بشيء، بس تعلقه صار مرضي ومنفر.
حاولت أعرفه على ناس ثانية عشان يفك عني شوي، لكنه دايم يتعذر إنهم "حقين خراب" مع إنهم ناس طيبين. أنا إنسان مغترب، وقلت له إني بيوم ممكن أرحل أو أرجع بلدي، رد علي بكل برود: "عادي أجي معك هناك".
الموضوع بدأ يأثر على سمعتي، الناس صاروا يلمحون إني أستغله ماديًا، أو يطلعون علينا إشاعات وسخة (شواذ) بسبب ملازمتنا لبعض طول الوقت. تعبت من نظرات الناس وتعبت من الضغط اللي هو حاطني فيه. حتى لما أحاول أسحب عليه عشان يحس، أبوه يتصل علي ويترجاني أطلع مع ولده لأنه منفس وحابس نفسه!
وش الحل مع إنسان كذا؟ كيف أقدر أطلعه من حياتي أو أخليه يعتمد على نفسه بدون ما أخسر أهله أو أدخل في مشاكل؟
افيدوني يرحم والديكم لي سنه ادور حل من تطبيق لتطبيق تعببت
Posted May 13, 2026, 11:23 PM UTC