كارثة اسعار الاجهزة بالعراق

ليش اسعار الاجهزة بالعراق صاعدة بزيادة عن اللزوم؟

احد المحلات الي بشارع الصناعة گلي مرة، انو هاي المحلات كلها كاعدة تشتري من دول فقيرة واسعار الهاردوير عدهم هناك كلش رخيصة، يجيبونها يمنا على اساس انو هاي القطعة اشتراها من الوكيل ويبيعها عليك بسعر مبالغ حتى اكثر من سعر الوكيل نفسه

على سبيل المثال معالج ryzen 7 7800x3d, صارلة سنتين او 3 من نزل بس الى الان اداءه قوي جداً، المشكلة وين؟ المشكلة محلات الصناعة كاعدين يشترون المعالج tray, وللي ما يدري المعالجات الـtray معالجات تجي بكميات ضخمة جدا لاصحاب المحلات والشركات وتجي بأسعار ارخص بهواية من المعالج الـin-box, المصيبة انو المحلات كاعدين يشترون معالج الـ7800x3d الـtray ويبيعونه اغلى من المعالج الـin-box!!!؟، المصيبة اللاخ سوگ المستعمل محد يقبل يبيع التجميعة مالته بسعرها الحقيقي او المعقول، واغلبهم عبالهم البي سي مثل الموبايل يحافظ على سعره بمرور الزمن، ذاك اليوم لكيت واحد يبيع 3060 وية ryzen 5 5500 ورامات 16 ddr4،مستعمل طبعاً، بمليون و850!!!!؟، يگول والله لان اني اشتريتها بوكت ما صعدت اسعار الكروت اذا ما عاجبك لا تشتري، وكلهم ديبيعون هيچ

والاسعار عندك مثل موقع ebay اغلب الاسعار معقولة وزينة مرات تلكه اسعار كلش زينة بس المشكلة ماكو توصيل من الخارج

لان لو اكو توصيل قطع من الخارج باسعار معقولة چان محد اشترى من محلات الصناعة ولا محلات المستعمل

طبعا اكو توصيل عن طريق شركات طرف ثالث بس مو عملي ومرات تصير بي مشاكل وتتأخر الشحنة

اكو حل لهالموضوع واكو محلات تبيع باسعار معقولة لو بس نباوع ونموت قهر؟