دخلت امبارح الفيلم وبصراحة عجبني كفيلم اكشن ، الاتنين المخرجين دول واخدين كامل الحرية يعملوا اللي هما عاوزينه وهما افكارهم مطرقعة اوي ، ابهار على مستوى الاكشن والمستوى البصري ومستوى النجوم اللي فالفيلم ،القصة زي اي فيلم اكشن امريكي مفيهاش اي نوع من انواع الابتكار بس برضه مش سيئة اوي ومفيش حد داخل الفيلم ده عشان القصة يعني انت تداخل تتفرج على مشاهد اكشن.

اللي كنت خايف منه قبل ما ادخل الفيلم هل كريم وعز هيقدروا يقدموا اكشن زي زمان؟ ، خصوصا ان الاتنين معديين ال٥٠ حاليا واخر فيلم لكريم كان المشروع اكس واللي كان زبالة والاكشن فيه حقير ، واحمد عز اخر فيلم اكشن ليه كان ولاد رزق ٣ واللي مكانش على مستوى الجزئين اللي قبله ، وكنت حاسس الاتنين ميس كاست وجايين عشان الفيلم يبيع فقط

والاجابة : مستوى الاكشن في الفيلم ده مضايقنيش خالص ، تحس كريم عبد العزيز بالذات رجعله جزئ من حيويته المفقودة اخر فترة ، بس لسة عند رأيي ان الاتنين ميس كاست وكانوا محتاجين ممثلين اصغر بس طبعا هما اعلى نجمين في الوطن العربي حاليا عشان كدا الفيلم ده اتعمل واتصرف عليه عشان ضامنين ان هيرجع فلوس 

التمثيل في الفيلم مضروب بالنار طبعا ده اخر حاجة تستناها هنا 

في مشهد كذا كوميدي ضحكني جدا  والكيميا بين كريم عبد العزيز و احمد عز فالقمة بتاعتها في الفيلم ده

شيئ خنقني وانا بتفرج البروباجاندا السعودية الكتير اللي بتبتدي من اول الفيلم وبتنتهي مع انتهاؤه بس مليش حق اتضايق الفيلم انتاج سعودي كامل وقصة تركي ال الشيخ وهما ناس بيلعبوا على حوار القوى الناعمة دلوقتي وانا عارف ده من قبل ما اخش ومع ذلك برضه اتضايقت

ومشهد الانفجار ملوش لازمة نهائي

الخلاصة : فيلم بوبكورن مطرقع مع الكثير من البروباجاندا السعودية ومشاهد الاكشن الجيدة 

بس كعادة افلام الاكشن يعني هيتنسي بعد سنة بالكتير 

التقييم ٦،٥ / ١٠

7dogs review (no spoilers)