عندي حاجات كتير عايز أحكيها

نفسي احكي حاجات كتير

بكره المواصلات والنهارده كان عندي إمتحان وعشت تجربه مليئه بوجع الركبه المحشورة في الكرسي اللي قدامي لمدة ساعتين وحر وتلزيق وريحة عرق من كل حته وواحد كمل علينا واداها واحده جيصه ملوكي فشختنا طول الطريق والمكروباص كله كان عمال يبص لبعضه في حاله اتهام متبادل

ركبت المترو الجو كان هادي الحمد لله الى حد كبير ماعدا شوية عواجيز كان بيلقحوا عليا انا والشباب اللي قاعدين بدون سبب بس عادي بيسلوا بعض

وصلت الامتحان هبدت اللي فيه النصيب وسيبت شوية أسأله وبعدين سلمت وروحت رحلة الرجوع كانت شبه رحلة الذهاب جدا حر وتلزيق وخنقه ورجل محشوره في الكرسي اللي قدامي

شيء عشوائي خطر في بالي عوامة البنزين بايظه في العربيه بتاعتنا ،وشايل هم الموضوع مش عشان كبير لا عشان التعامل مع الميكانيكه في مصر من أسوء التجارب الانسانيه ،كمية نصب وكذب واحتيال محصلتش في العالم وربنا لو اعرف اغيرها لوحدي كنت عملت كده انا زهقت من الناس دي وربنا

عارف ان المفروض ما اعممش ولكن النسبه الاكبر منهم كده وبيحدفونا لبعض حرفيا وكلهم متفقين مع بعض

ليه الموضوع ميكونش سهل وسلس وطبيعي اغير القطعه وادفع تمنها وتمن التركيب ويخلص بسرعه وامشي ليه الكذب والفهلوه واللف والدوران حقيقي شيء يخنق