موقف حصل في خلال الترم دا من الكلية و مستغربه و مش عارف احكيه لمين

تعريف بسيط عن نفسي انا نوعاً ما مشهور في دفعتي بحكم اني بذاكر و فنفس الوقت اجتماعي و ودود مع الناس

المهم انه فيوم واحد من السرسجية اللي بيقعدو ورا اللي انا علاقتي كويسة معاهم لقيته بيكلمني بيقولي "يا فولان البنت دي على فكرة معجبة بيك فشخ و انا واخد بالي من فترة انها بتبصلك بس انت مش واخد بالك"

البنت دي كانت من البنات اللي منطقتش معاها حرف من ساعة ما دخلت الكلية ولا جت فرصة بالصدفة ولا اي حاجة علشان هي من النوع الساكت خالص حتى البنات ملهاش صحاب غير اتنين تقريباً و كمان هي مسيحية و انا مسلم

(يعني مش متدين بالمرة بس اسمي قدام الناس مسلم)

فالتصرف الطبيعي اني مشيت الموضوع و اخدته انه بيستهبل او حاجة زي كدا

عدت الأيام و تقريباً بعد اسبوعين من الموقف اضطريت اني اتعامل معاها علشان اسألها على حاجة في محاضرة محضروهاش غير ٥ (و انا اخترت اسألها بصراحة لأن الموضوع كان في دماغي)

سألتها و جاوبتني عادي بس لاحظت انها بتسيب مجال اني اتكلم بس مأخدتش فبالي

بعدها بشهر هي بعتتلي شات تسألني على حاجة و انا جاوبت عادي بس هي مسكتتش تقريباً فضلت بتحاول تفتح مواضيع من اليوم دا الصبح يعني الساعة ٩ مثلاً إلى الساعة ١١ بليل مع بعض التقطع في النص

في الوقت دا انا تأكدت من كلام الولد دا و استغربت جدا بالذات اني بني ادم الself esteem بتاعه مش عالي و تقريباً دي اول مرة احس في بنت معجبة بيا

دلوقتي عدت فترة كمان و بقيت انا و هي بنتكلم بشكل شبه يومي شات في رغي

بس الموضوع بالنسبالي لسه غريب هو ازاي الولد دا لاحظ و هل هو طبيعي في مجتمعنا المصري دا ان بنت مسيحية تحاول تقرب من ولد مسلم؟

ولا انا بأوفر ثينك الموضوع لأني كنت shut in قبل الكلية

علشان محدش يفتكرني ungrateful للي بيحصلي او حاجة زي كدا انا بس مستغرب شوية من الأحداث اللي حصلت لأن دي اول تجربة ليا مع حاجة زي كدا