هل طريقتي بالتعرف على زملائي بالعمل غلط؟

أنا بنت كنت عاطلة قرابة ثلاث سنوات، والحمد لله حصلت على تدريب
تمهير وصار لي الآن حوالي شهرين فيه.

أنا من طبيعتي شخصية اجتماعية جداً، ما أطيق الوحدة وأحب أندمج مع الناس بسرعة، والحمد لله قسمي كله ناس محترمين، ويا بعض وفيه روح، بس المشكلة إن عدد البنات في القسم قليل ما يتجاوز ٦
بنات والباقي ذكور.

المشكلة اللي تعبتني:
من اليوم الأول وأنا أحاول بكل جهدي أندمج مع البنات، أبادر بالسلام، أسأل عنهم، أفتح سوالف، بس اللي يصير إني أنا اللي أبادر دايماً وما أحد يبادر لي من تلقاء نفسه، مو إنهم وقحين أو ما يردون، بالعكس لو احتجت مساعدة ما يقصرون، بس ما في أحد يمشي خطوة تجاهي.

أكثر موقف مزعجني إني أشوفهم أحياناً كلهم يتجمعون في غرفة وحدة ويسكرون الباب وعندهم وناسة وسوالف، وأنا أطالع من بعيد ما أقدر أدخل، وحتى مشرفتي لاحظت وسألتني ليش ما أدخل وياهم، بس ما تدري إني من زمان أحاول بدون أي فايدة!

أحاول أحسن الظن وأقول لنفسي يمكن مكتفين بأنفسهم، أو يمكن مروا بتجربة سيئة مع أحد قبل، بس في نفس الوقت أخاف الناس تاخذ عني انطباع غلط وتقول "ليش هذي البنت لحالها؟ أكيد فيها شي!" لأن المشرفة بنفسها لاحظت إني لحالي لكن ما لاحظت محاولاتي.

زميل كبير بالعمر في القسم بينا سواليف سألني إذا دخلت وياهم ولا لا، ولما قلت له لا، قال لي إن السبب على الأرجح طريقة تعارفي في أول الأيام، لأني كنت أمر على الموظفين واحد واحد وأعرف بنفسي بشكل مباشر: "أنا فلانة، متدربة جديدة، وودي أتعرف عليك." وقال إن هذا الأسلوب يخلي الناس يشوفون الشخص "اندفاعي وجريء بزيادة"
وأنا صراحة تقبلت رأيه لكن ما اقتنعت، لأن هذي ببساطة شخصيتي وأحب أتعرف على الكل، ومو من طبيعتي أجلس وأنتظر أحد يجي لي.

اللي ودي أخذ رأيكم فيه:
هل فعلاً تعريف الشخص بنفسه بشكل مباشر يُعتبر شيء سلبي ويخلي الناس ينفرون منه؟

وش رأيكم، هل أنا اللي أبالغ في الموضوع، أو فعلاً الموقف يستاهل الإزعاج اللي أحس فيه؟