مشكلة حصلت معايا في امازون لاول اوردر ليا

انا متعود دايما استعمل نون للطلبات الي داخل مصر وعلي اكسبرس خارج مصر وكانت الدنيا حلوه بالنسبالي مع الاتنين 

جيت من كام يوم قلت طيب ما اجرب اطلب من امازون لاني بسمع انو افضل من نون في موضوع خدمة العمله وحاجات زي كدا 

فا من كام يوم طلبت تلات اوردرات من امازون هوه انا كنت هطلب اتنين بس التالت جا كدا معاهم كمالة فلوس 

المشكلة بدئت لما طلبت الاوردرات وكان ظاهر ليا ان التلاته هيوصلو الجمعه الجايه الي هيه بكرا 

انا اول امبارح دخلت اعمل استعلام عن الطلبات اشوف وصلو لحد فين كان برضو ظاهر ليا ان التلاته هيوصلو الجمعه، امس الي هوه الاربعاء انا كنت في مشوار فا لما جيت لقيت شخص بيرن وبيقولي حضرتك طالب اورد وتعال استلمو وبتاع انا استغربت طيب منا عامل استعلام امبارح واتاكدت انهم جايين الجمعه بس قلت مش مشكلة حلو انهم وصلو بدري

رحت للشخص دا وسلمني الطلبيه ببص لقيت حاجة واحده بس من الي طلبتها فا بقول الشخص اذاي انا طالب تلات حاجات والي وصلني حاجة واحده بس ومش دي الحاجه الاساسيه قالي الباقيين هيجو في معادهم وبتاع 

انا مش فاهم لحد دلوقتي ليه امازون بعتت طلب واحد في طرد لوحديه طيب ما ايه الهدف كانو يتبعتو كلهم مع بعض في طرد واحد بس مش دي المشكلة الاصليه

انا زي ما قلت طالب تلات اشياء اتنين منهم عاملين مبلغ حوالي 1500ج والتالت دا كان قدامي فا اشتريتو 

الطرد الي وصلني الي هوه كان التالت والي هوه كماله كانت لعبة UNO كنت طالبها لاخويا 

لما جيت اشتري اشترين من الصفحه الاصليه الخاصه بشركة ماتيل المصنعه للعبه عشان ابقي ضامن (زي ما باين في الصوره تقييمات المنتج حوالي 4.3 نجوم و 83k  مراجعه دا غير انو الاكثر مبيعا) 

الي حصل اني لما فتحت الطرد ملقتش اللعبه الاصليه لقيت تقليد رخيص من اللعبه اسمو undini حاجة زي كدا خامتو معفنه شكل مختلف الخلاصه تقليد رخيص بما تحمله الكلمه 

انا اتعصبت وقلت اذاي ابقي طالب من صفحة الشركه نفسها ويوصلي منتج غير اصلي يعني احا بجد اذاي كان الصفحه الاصليه ودا الي وصلني امال كان المفروض اطلب منين (وكمان تمن المنتج بالنسبة لباقي البياعين كان يعتبر غالي في بياعين تانين كتير موفرين نفس المنتج بنص التمن تقريبا) 

انا كدا كدا عملت استرداد ومستني لكن الان تظهر المشكلة الحقيقه بالنسبالي 

انا الحاجتين التانين الي طالبهم غاليين ميجوش حاجة قصاد اللعبه دي والمشكله ان تقييماتهم ومراجعاتهم مش عاليه زي دا يعني واحد فيهم حوالي 3.5 نجوم 

الي مخوفني ان اقل منتج فيهم سعر واكثرهم تقييم ومراجعات واضمنهم طلع خازوق امال المنتجين التانين هيبقو ايه

انا خايف من الحوار دا ومعنديش لا وقت ولا خلق لاني استلمهم ويطلعو خازوق واقعد اعمل ارتجاع وبتاع 

هل الغي الاوردين واشتريهم من نون او جوميا ولا اعمل ايه بجد يعني اول تجربه ليا في امازون تكون كدا ومع منتج شاريه من الصفحه الاصليه ومتوافر فيه كل الشروط الي بتقول ان دا مش نصب مش عارف كان المفروض اعمل ايه اكتر من كدا حقيقي تجربه زباله وان شاء الله لو استلمت منتج من الاتنين الي في السكه وطلع واحد فيهم خازوق دي هتبقي اول واخر تجربه ليا في امازون 

خازوق امازون