تخيل القصة كأنها رواية قصيرة في زمن بعيد مش ممكن العقل يتخيله ماتت الشمس بعدين ماتت النجوم القريبة وبعدين بعد بلايين تانية من السنين اختفت آخر النجوم في آخر المجرات الكون مبقاش مكان مليان أنوار زي ما بنشوفه النهاردة، بل بقى بحر ملوش آخر من العتمة مابقاش فيه صبح أو ليل مبقاش فيه صوت مابقاش فيه حد إلا إنسان واحد كان عايش في محطة ضخمة مكانش بيحتاج ينام كتير الذكاء الاصطناعي بيدير كل حاجة الأكل بيتعمل آلي والأجهزة بتصلح نفسها بنفسها وهو ورث كل علوم الحضارات اللي قبله كان آخر وريث لسلسلة عمرها مليارات السنين


في الأول مكانش حاسس بالوحدة كان عنده أرشيف كامل لكل الكتب اللي كتبتها البشرية كل المزيكا كل الأفلام كل الرسائل اللي بعتها البشر لبعض عبر التاريخ كان بيقدر يسمع أصوات الموتى لكن بعد آلاف السنين حفظ كل حاجة قرأ كل كتاب سمع كل أغنية شاف كل قصة ولأول مرة أدرك حقيقة مرة كل اللي اتكلم في التسجيلات دي مات من زمن مش ممكن يتخيلو كل اللي حب أو خاف أو ضحك أو بكى مبقاش موجود هو لوحده اللي باقي


في يوم من الأيام بص في المرآة وسأل نفسه أنا مين سؤال عادي لكن مبقاش فيه حد ممكن يجاوبه لو قال لنفسه إنه بطل فمين هيناقشه لو قال انه جبان مين هيعترض لو قال انه أعظم عقل عرفه الكون مين هيتأكد من ده هنا بدأ يكتشف إن حاجات كتير كان فاكرها جزء من هويته كانت بتعتمد على وجود الآخرين الشجاعة محتاجة خطر الكرم محتاج شخص تاني تديله الحب محتاج محبوب الصدق محتاج من يسمع الحقيقة حتى اللغة نفسها بدأت تتفكك في دماغه الكلمات اتعملت أصلا للتواصل بس التواصل مع مين بقى ساعات يقعد سنين كاملة من غير ما ينطق بكلمة واحدة


بعدين جتله فكرة إيه يحصل لو طفى كل الأجهزة من حواليه عمل كده اختفت الشاشات اختفت الأصوات الاصطناعية اختفت الإشارات بقى قاعد في سكات مطلق لأول مرة مبقاش في الكون أي حاجة بتطلع صوت غير عقله هناك أدرك حاجة أغرب، طول تاريخ الحياة كان كل كائن بيعيش داخل عالم مشترك حتى أكتر الناس عزلة كانوا عارفين إن فيه آخرين في مكان ما أما هو  بقى عايش في واقع مفيش فيه أي شاهد تاني محدش يقدر يؤكد وجوده ولا حد يقدر ينفيه


فبدأ يسأل نفسه لو غمضت عيني دلوقتي هل فيه فرق بين كون فاضي تماما وكون عايش فيه لوحدي عدت قرون وهو بيفكر بعدين وصل لسؤال أكتر رعب لما أموت أنا كمان اي اللي هيحصل لكل المعرفة اللي في دماغي كل تاريخ البشرية كل الاكتشافات كل الفلسفات كل القصص كل اللغات كل الذكريات كلها هتختفي مرة واحدة مش عشان هي غلط أو ضعيفة بل عشان مش هيبقى فيه عقل واحد شايلها


هنا بدأ يتساءل هل الحقيقة موجودة لو مفيش عقل يعرفها لو كان فيه معادلة صح في مكان ما من الكون بس مفيش أي كائن واعي يدركها هل لسه حقيقة ولو كان فيه ذكرى جميلة محدش فاكرها هل لسه موجودة بطريقة ما بعدين جاء السؤال الأخير طول التاريخ كان البشر بيخافوا من الموت عشان هيفقدوا العالم أما هو فكان بيخاف من موته لسبب تاني مختلف ، بموته مش هيفقد العالم وبس بل العالم نفسه هيفقد آخر شاهد عليه


ولما جاء يوم موته أخيرا مكنش بيفكر في نفسه كان بيفكر في حاجة واحدة هل الكون محتاج للي يشوفه عشان يكون موجود ولا النجوم والفراغ والزمن استمروا طول الوقت مش فارق معاهم وجود أي عقل يراقبهم بعدين انطفى آخر عقل وهنا بتخلص القصة ويترك لك مردوك خيال اكمالها 

  


حدوتة قبل النوم ( اخر انسان في الكون)