(مراجعة للسلسة بدون حرق)

1. Blade Runner (Feature Film, Originally Released in 1982 - The Definitive "Final Cut" Released in 2007)

2. Blade Runner Black Out 2022 (Animated Short, Released in 2017)

3. 2036: Nexus Dawn (Live-Action Short, Released in 2017)

4. 2048: Nowhere to Run (Live-Action Short, Released in 2017)

5. Blade Runner 2049 (Feature Film, Released in 2017)

6. Blade Runner: Black Lotus (Animated Series, 2021-2022) | Set between the two feature films

___

وأخيراً صحتلي فرصة خصص من وقتي مجال لغوص بشكل جدي بهاد العمل

من سنين بسمع عنو وشايفة كتير ميمز و مقاطع عشوائية بس ما عطيتو فرصة محترمة إلا لحد هلئ و ما اندمت انو تأخرت عليه لأنو ما بتوقع كنت رح قدرو او افهم جوهرو بعمر أصغر

​واحد من الأعمال الفلسفية الشاعرية اللي اكبر من بس ترفيه و بتخليك تقعد تصفن بجوهر الوجود البشري.. هاد الانطباع المباشر اللي رح تشوفو بالجزء الكلاسيكي الاول واللي الجزء التاني بعيد صياغتو وترسيخو بلوحة سينمائية كاملة الدسم و بإنتاج معاصر و اقوا

حالياً في جزأين أساسيين مع 3 افلام فرعية قصيرة بيناتن و مسلسل أنمي قصتو بين الجزأين كمان.. و هلئ في مسلسل ضخم قادم رح يكمل القصة بس لسا مطول شوي

الجزء الأول بلنسبة لستاندرات اليوم ممكن تحسو ممل شوي بسبب ضعف القدرات الأنتاجية بوقتو لكن ضروري ينشاف لأنو هو حجر الأساس لفكرة العمل: "شو اللي بخلي الإنسان إنسان؟"... الجزء التاني بعدين بياخد هاد السؤال و بغوص في بشكل أعمق و بجدية اكبر

الافلام القصيرة التلاتة (مجموع مدتهن شي نص ساعة) هني عبارة عن مقبلات و تمهيد قبل البداية بلجزء التاني، كمان ضروري تشوفوهن لأنو بوضحو نقاط مهمة بلعمل

الجزء التاني (الوجبة الرئيسية).. سرد مفصل و صبور على تقريباً 3 ساعات من تحفة و متعة بصرية مع كل مقطع، غير الساوندتراك اللي بتحاكي نبض الآلات وضجيج العصر الصناعي و جو السايبربانك بشكل عبقري.. غلط كبير اذا بتشوفو الفيلم بدقة/جودة واطية حتكونو قتلتو جزء كبير من التجربة بلأخص انو في اكتر من مقطع بيحتوي على كتابات مهمة لكن بخط ضروري انو يكون صغير زيادة ليتناسب مع طبيعة المقطع

بركز الفيلم على رحلة ضابط بلاقي حالو بوج لغز مدفون بهدد استقرار المجتمع الفوضوي و بزلزل قناعاتو الشخصية بهويتو وقيمتو.. و بيغرق بوحدة من الطبقات الفلسفية بالفيلم واللي بتناقش فكرة "الذكريات المصنوعة" وتأثيرها على العاطفة.. أداء الممثل راين اللي بجسد هي الشخصية بيوصل لمستويات بتخلي المقاطع تطج على راسك و تخليك تحس و تفهم مشاعر الشخصية و تتأثر معها بشكل كتير سلس

الفيلم بحطك بزاوية هية نفسها اللي بحط فيها الشخصيات تبعو، مافي إجابات سهلة او شي واضح حتى مع محاولة فهم مركزة و احياناً بتحس انو عطاك كتير بس بنفس الوقت ما عطاك شي، و بتعلق بدوامة جماليتها بتعقيدها وعدم فهمها بشكل كامل أساساً

السرد الهادي و المفصل خلال ما يقارب الـ 3 ساعات ضايف على قوة الجاذبية للفيلم، بتعلق معو و بتنسي حالك و كلشي حوليك و بتحس مع كل ربع ساعة غرقت في بشكل أعمق و ما بتقدر تقطع المشاهدة

سلسلة العمل كلا شي جدا مشبع لشغف جمهور السينما الفلسفية والتقيلة، دون ما يزحط بحفرة الأعمال التجارية بتقديم جزء تاني و دون ما يخفف من وزنو بغصب كوميديا او اللعب على حركات جذب رخيصة لينهضم بشكل أسهل مع جمهور اكبر..

السلسة موجهة لجمهور الخيال العلمي العميق و الناضج ما بتحاول انها تعجب الكل، و يمكن بسبب عدم المحاولة هي بحد ذاتا انشدت كتير ناس للفيلم اكتر و ساوا ضجة بعالم السينما..

اذا مليتو من افلام الترفيه السريعة و حبيتو تشوفو شي دسم و يعبي الراس على المدى الطويل فهي وحدة من السلاسل اللي لازم تحطوها على رأس القائمة و تعطوها فرصة جدية

(السلسلة غير ملائمة للمشاهدة العائلية)

Blade Runner | مراجعة لقطعة من تحف الخيال العلمي