ليه صاحبتي عملت كدا؟

صاحبتي (البيست فريند) اتصلت بيا قعدنا نتكلم شويه وبعدها بشويه موبايلها التاني رم وهي كانت فاتحة السبيكر وطلع صاحبها اللي متصل ( هو عارفني عارف اني صاحبتها يعني بس مفيش بيني انا وهو كلام اتكلمنا مره بس كدا كنت معاها سلم عليا وبس) المهم هي كانت فاتحه السبيكر عليا وعليه يعني هو سامعني وانا سمعاه وسلم عليا ف الاول كدا وطلع معاه واحد صاحبه قعدو يستظرفو عليا هما الاتنين ويشتمونا انا وهي وصاحبه يقولي طوووط امك وامها ! فجاه كدا من غير سبب ! طبعا هي سامعه الكلام كله وقاعده بتضحك وانا دمي محروق
المهم كملو ف استظرافهم وقاعدين بيتكلمو بصوت بنات كدا انو يعني بيتريقو ع صوتي ف رحت قايله لصاحبه انت مالك بتتكلم زي النسوان كدا ليه ماتسترجل شويه ! المهم قعدو يكلمو دقيقه دقيقتين كدا ف الاستظراف وقلة القيمة اللي عاملينها بهزار دي وانا مصدومه وصاحبتي بس قاعده تضحك!!! ف طلعت عن شعوري وشاتمة الكل وقفلت ف وشها
قعدت تتصل وتبعت وتقلب الدنيا انا كلمت خطيبي وحكيتله اللي حصل وهو كلمها هزقها وبعدها رديت عليها عشان قعدت تقوله خليها ترد عليا قعدت تدافع عن صاحبها وصاحبه وتقولي مشتموش دا انتي اللي شتمتيهم!!! وانا فعلا اه شتمتهم بس بعد ايه؟؟؟؟ انا كنت رد فعل
المهم قولتلها لو هتفضلي تدافعي عنهم متتكلميش معايا تاني وقفلت ف وشها وقطعت علاقتي بيها
انا نفسي الاقي تفسير للعبث اللي حصل دا